Jumysshy mamandyqtary jyly: Oral qalasynda «Adam. Eńbek. Ólke» atty fotokórme ashyldy
ORAL. KAZINFORM — Oral qalasyndaǵy «Atameken» óner ordasynda kásibı fotograf, «Úrker» syılyǵynyń ıegeri Meıirbek Tajquranovtyń «Adam. Eńbek. Ólke» atty fotokórmesi kelýshiler nazaryna usynyldy.
«Jaıyq Press» JShS men BQO kásipodaqtar ortalyǵy uıymdastyrǵan, eńbek adamdarynyń ómiri men eńbegin arqaý etken fotokórme Jumysshy mamandyqtary jylyna arnaldy. Bul — eńbek adamynyń qoǵamdaǵy ornyn aıqyndap, onyń mártebesin kóterýge baǵyttalǵan mańyzdy bastama.
Sonymen qatar bıyl Qazaqstandaǵy kásipodaqtar qozǵalysynyń 120 jyldyǵy, QR Kásipodaqtar federatsııasynyń 35 jyldyǵy keń kólemde atalyp ótilýde. Osy tarıhı oqıǵalar aıasynda elimizde eńbek mádenıetin dáripteýge, jumysshy mamandyqtarynyń mańyzyn arttyrýǵa jáne kásipodaqtardyń el damýyndaǵy rólin kórsetýge arnalǵan birqatar jobalar iske asyrylyp jatyr. Sonyń biri — Adam. Eńbek. Ólke» atty fotokórme.
Fotokórme el aýmaǵyndaǵy ár túrli salalarda eńbek etip júrgen qarapaıym jumysshylardyń shynaıy beınesin, olardyń ómir súrý saltyn, eńbektegi tabandylyǵy men kásibine degen adaldyǵyn kórsetedi.
— Kásipodaq uıymy úshin eńbek adamy — basty qundylyq. Sondyqtan osyndaı kórme arqyly biz qoǵam nazaryn qarapaıym eńbek ıeleriniń eren eńbegine aýdarǵymyz keledi. Bul — eńbekke degen qurmetti arttyrýdyń, jastardy kásiptik-tehnıkalyq bilim alýǵa yntalandyrýdyń, sondaı-aq kásipodaq qozǵalysynyń tarıhı róli men búgingi mıssııasyn keńinen tanystyrýdyń bir joly, — dedi BQO kásipodaqtar ortalyǵy tóraǵasynyń orynbasary Baýyrjan Ataýov.
Onyń aıtýynsha, «Adam. Eńbek. Ólke» kórmesi — bul óner men eńbek úndestigin tanytatyn erekshe joba. Kelýshiler ár fotosýretten tek kásibı sheberlikti ǵana emes, elge degen súıispenshilikti, týǵan jerge degen janashyrlyqty da sezine alady.
Meıirbek Tajquranov kásibı fotosýret túsirýmen aınalysyp kele jatqanyna 12 jyl bolǵanyn jetkizdi.
— Buǵan deıin de fotokórmelerim de uıymdastyrylyp júr. Degenmen oblystyq deńgeıde alǵash ret 80-ge jýyq eńbegim qoıylyp otyr. Fotokórme 30 qyrkúıekke deıin jumys isteıdi, — dedi M.Tajquranov.
Elektromonter Arshat Nurjanuly kórmeden mol áser alǵanyn aıtady.
— Osyndaı aýqymdy is-sharada óz sýretińdi kórý erekshe sezimge bóleıdi eken. Al sol sátti sheberlikpen sýretke túsirýdiń ózi yjdaǵat pen eńbek ekenine túsirilim barysynda kózim jetti. Meni de kópshilikke tanytqany úshin Meıirbekke alǵysymdy bildirip, shyǵarmashylyq tabys tileımin, — dedi A.Nurjanuly.
Eske sala keteıik, budan buryn Oralda halyqaralyq sýretshiler sımpozıýmy máresine jetkenin jazǵan bolatynbyz.