Jumysshy mamandyqtar jyly: X Respýblıkalyq WorldSkills Kazakhstan 2025 chempıonaty ótedi
ASTANA. KAZINFORM — 3-9 jeltoqsan aralyǵynda Astana qalasynda elimizdiń tehnıkalyq jáne kásiptik bilim berý júıesin damytý, jumysshy mamandyqtardyń bedelin kóterý jáne kadrlar daıarlaý sapasyn jetildirý maqsatynda WorldSkills Kazakhstan-2025 kásibı sheberlik X mereıtoılyq respýblıkalyq chempıonaty ótedi.
Oqý-aǵartý mınıstrliginiń málimetinshe chempıonatta elimizdiń barlyq óńirinen kelgen 825 qatysýshy jáne 719 sarapshy baq synaıdy. Saıystar ekonomıkanyń negizgi baǵyttaryn qamtıtyn óndiris, ınjenerııa, aqparattyq tehnologııa, servıs, qurylys, áleýmettik qyzmet jáne kreatıvti ındýstrııa sııaqty 45 quzyrettilik boıynsha ótkiziledi.
Aıta ketý kerek, WorldSkills International qozǵalysy 1946 jyly qurylǵan jáne álem boıynsha kásibı quzyretterdi damytý men jumysshy mamandyqtardyń bedelin arttyrýǵa baǵyttalǵan halyqaralyq platforma. Búginde qozǵalysqa 89 el múshe, olar birlesip zamanaýı ekonomıkanyń talaptaryna saı kadrlar daıarlaýdyń biryńǵaı standarttaryn engizip jatyr.
Qazaqstan Respýblıkasynda WorldSkills Kazakhstan jobasy 2015 jyldan beri iske asyrylyp keledi. Jobanyń Ulttyq operatory - Oqý aǵartý mınıstrliginiń «Talap» KEAQ, ol Qazaqstannyń atynan WorldSkills International jáne WorldSkills Europe uıymdarynda ókildik etedi.
Aıta ketelik bıyl 5000-ǵa jýyq kolledj qyzmetkeri «Talap» KeAQ uıymdastyrǵan zamanaýı pedagogıkalyq quraldardy engizý, bilim berý protsesin tsıfrlandyrý jáne tájirıbege baǵyttalǵan oqytýdy kúsheıtý baǵytynda biliktilikti arttyrý kýrstarynan ótken edi.