Jumysshy mamandyqtar jyly: Taldyqorǵanda Fab-Lab ınnovatsııalyq zerthanasy ashyldy

ASTANA. KAZINFORM – Taldyqorǵan joǵary polıtehnıkalyq kolledjinde elimizdegi zamanaýı Fab-Lab ınnovatsııalyq zerthanasy ashyldy. Bul týraly Oqý-aǵartý mınıstrliginiń baspasóz qyzmeti habarlady.

Innovatsııalyq zerthana stýdentterdiń ınjenerlik jáne tsıfrlyq daǵdylaryn damytýǵa baǵyttalǵan.

Fab-Lab (Fabrication Laboratory) — álemniń jetekshi oqý oryndary qoldanatyn tsıfrlyq óndiris zerthanalary jelisiniń halyqaralyq formaty.

Zerthana úsh negizgi baǵytta jumys isteıdi:

- Robototehnıka zerthanasy – NAO gýmanoıd robottary men WorldSkills standarttaryna saı platformalar arqyly qurastyrý jáne baǵdarlamalaý daǵdylaryn damytýǵa arnalǵan.

- 3D modeldeý jáne 3D basyp shyǵarý zerthanasy – Fusion 360, SolidWorks, Blender baǵdarlamalarynda prototıpter men tsıfrlyq modelder jasaýǵa múmkindik beredi.

- Jasandy ıntellekt zerthanasy – Python, mashınalyq oqytý, kompıýterlik kórý jáne neırondyq jeliler boıynsha praktıkalyq bilim alýǵa baǵyttalǵan.

– Jumysshy mamandyqtar jylynda osyndaı zamanaýı zerthanalardyń ashylýy – elimizdiń bolashaq ınjenerleri men tehnıkterin daıyndaýdaǵy úlken strategııalyq qadam. Fab-Lab jastardyń tek oqyp qana qoımaı, naqty ónim jasap, ınnovatsııalyq jobalar ázirleýine múmkindik beredi. Bul — eńbek naryǵyna qajetti jańa býyn mamandaryn qalyptastyrýdaǵy mańyzdy bastama, – deıdi Tehnıkalyq jáne kásiptik bilim berý departamentiniń basshysy Áset Muhambetov.

Jańa ortalyq stýdentterge teorııany tájirıbemen ushtastyryp, óz ıdeıalaryn iske asyrýǵa, ónerkásip pen IT salasyna qajetti jobalar ázirleýge jol ashady.

Aıta keteıik, Qazaqstan geologııasyn jańǵyrtatyn hab iske qosyldy.