Jumysshy mamandyqtar jyly: kolledjdermen áriptestik ornatqan kásiporyndar sany artty
ASTANA. KAZINFORM – Şýchınsk qalasynda tehnıkalyq jáne kásiptik bilim berý uıymdarynyń stýdentterine arnalǵan Respýblıkalyq slet bastaldy.
Oqý-aǵartý mınıstrligi málimetinshe, munda elimizdiń barlyq óńirinen kelgen 100-den astam belsendi jáne bolashaǵynan zor úmit kúttiretin jas mamandar óz daǵdylaryn shyńdap, keleshekke shabyt alý úshin jınaldy.
Іs-sharanyń ashylýyna Premer-Mınıstrdiń orynbasary Ermek Kósherbaev, Oqý-aǵartý mınıstri Ǵanı Beısembaev, Aqmola oblysynyń ákimi Marat Ahmetjanov jáne basqa da resmı tulǵalar qatysty.
Premer-Mınıstrdiń orynbasary Ermek Kósherbaev slet qatysýshylaryna sáttilik tileı otyryp, jumysshy mamandyqtarynyń el damýyna qosar úlesiniń erekshe ekenin atap ótti.
- Memleket basshysy 2025 jyldy Jumysshy mamandyqtar jyly dep jarııalady. Bul — tek bir salaǵa maman daıyndaý emes, el ekonomıkasynyń tiregi sanalatyn mamandyqtardyń mańyzyn qaıta baǵalaý. Birneshe jyldar boıy jumysshy mamandyqtaryna degen kózqaras birjaqty stereotıpter arqyly qalyptasty. Alaıda búgingi kúni jaǵdaı ózgerdi. Jumysshy — bul zamanaýı tehnologııany meńgergen, eńbek naryǵynda suranysqa ıe bilikti maman. Biz memleket retinde eńbekke laıyqty qurmet kórsetý úshin barlyq jaǵdaıdy jasap jatyrmyz. Sebebi jumysshy mamandarsyz ındýstrııalyq damý, óndiristi jańǵyrtý men ekonomıkalyq turaqtylyq múmkin emes. Bul ózgeristiń naq ortasynda sizder — jas mamandar tursyzdar, – dedi Ermek Kósherbaev.
Jyl basynan beri 8 myńnan astam kásibı baǵdar berýshi pedagog daıarlandy, jańa oqý jylynda 700-den astam beıindi synyp ashylady, qazirgi tańda 352 synyp iske qosyldy. 1300 mektep oqýshysy jumysshy mamandyqtarynyń bazalyq daǵdylaryn meńgerip úlgerdi. Sheftik etetin kásiporyndar sany 7 ese ósti, búginde 18 myń kásiporyn stýdentterdi dýaldy oqytý júıesimen daıarlap jatyr. 185 kolledjdiń materıaldyq-tehnıkalyq bazasy jańartylatyn bolady, stýdentterdiń jataqhanamen qamtylýy 96%-ǵa jetedi.
- Búginde eńbek naryǵynda tek dıplom ǵana emes, naqty daǵdy mańyzdy. Qazaqstannyń tehnıkalyq jáne kásiptik bilim berý júıesi jańa deńgeıge kóterilip jatyr. Qytaı, Frantsııa, Túrkııa, Japonııa, Ulybrıtanııa, Grýzııa jáne basqa da eldermen birge 10 halyqaralyq joba iske qosylyp jatyr. Kolledjderdi halyqaralyq sertıfıkattaý alǵash ret qolǵa alyndy. Endi bizdiń stýdentter óz quzyretin jahandyq standarttar boıynsha dáleldep, sheteldik taǵylymdamalarǵa, jumysqa jáne jahandyq eńbek naryǵyna shyǵý múmkindigine ıe bolady, - dedi Ǵanı Beısembaev.
Sletke qatysýshylardyń arasynda — Jambyl polıtehnıkalyq joǵary kolledjiniń 3-kýrs stýdenti Aıala Baıbolat bar. Ol memlekettik grantpen oqıdy, al onyń kolledji ınternatsıonaldandyrý jobasyna alǵashqylardyń biri bolyp engen.
- Prezıdent jumysshy mamandyqtar jylyn jarııalaǵanda, bizdiń eńbegimizdiń shynymen de mańyzdy ekenin sezindik. Qazirgi kolledjder — bul bolashaǵy bar tańdaý. Bizde zamanaýı sheberhanalar ashylyp jatyr, halyqaralyq taǵylymdamalar uıymdastyrylýda, eń bastysy — naqty múmkindikter bar. Bul senim men qoldaý úshin alǵys aıtamyn, - dedi kolledj stýdenti.
Slet 24 shildege deıin jalǵasady. Úsh kún boıy qatysýshylardy motıvatsııalyq kezdesýler, sheberlik sabaqtary, ınteraktıvti bilim bloktary, komandalyq tapsyrmalar men mazmundy mádenı jáne sporttyq baǵdarlama kútip tur.
Aıta keteıik, elimizde 772 kolledj bar, onda 550 myńnan astam stýdent bilim alady.
Eske salsaq, Jumysshy mamandyqtar jyly aıasynda tehnıkalyq jáne kásiptik bilim berý júıesi transformatsııalanýda. Osy jumystyń negizgi quraldarynyń biri - Oqý-aǵartý mınıstrliginiń «Talap» KEAQ ázirlegen tehnıkalyq jáne kásiptik, sondaı-aq orta bilimnen keıingi bilim berý baǵdarlamalarynyń Reestri boldy.
Reestr — bul eldegi barlyq kolledj baǵdarlamalary týraly tolyq, ózekti ári senimdi aqparat alýǵa kómektesetin zamanaýı tsıfrlyq resýrs.