Jumysshy mamandyqtar jyly: kolledj baǵdarlamalary jańaryp jatyr

ASTANA. KAZINFORM – Jumysshy mamandyqtar jyly aıasynda tehnıkalyq jáne kásiptik bilim berý júıesi transformatsııalanýda. Osy jumystyń negizgi quraldarynyń biri - Oqý-aǵartý mınıstrliginiń «Talap» KEAQ ázirlegen tehnıkalyq jáne kásiptik, sondaı-aq orta bilimnen keıingi bilim berý baǵdarlamalarynyń Reestri boldy. 

Reestr — bul eldegi barlyq kolledj baǵdarlamalary týraly tolyq, ózekti ári senimdi aqparat alýǵa kómektesetin zamanaýı tsıfrlyq resýrs.

Búginde Reestrde respýblıka kólemindegi 667 kolledj usynǵan 181 mamandyq boıynsha 8 554 baǵdarlama qoljetimdi. Onyń 96%-y tehnıkalyq jáne kásiptik bilim (TjKB), al 4%-y — orta bilimnen keıingi deńgeıde. Baǵdarlamalardyń 55%-y memlekettik tilde ázirlengen.

— Biz árbir bilim berý baǵdarlamasynyń qazirgi eńbek naryǵy talaptaryna saı bolýyna erekshe nazar aýdaramyz, — dedi Tehnıkalyq jáne kásiptik bilim departamentiniń dırektory Áset Muhanbetov.

Shamamen 2,5 myń baǵdarlama dýaldy oqytýǵa baǵyttalǵan, 70 baǵdarlama erekshe bilim berý qajettilikteri bar jandarǵa arnalǵan. Jambyl ınnovatsııalyq joǵary kolledji sheteldik seriktespen birlesip (ACCA, Anglııa)
baǵdarlama ázirledi. 139 baǵdarlama basqarý jáne ınjenerlik mamandyqtar klassıfıkatory negizinde qurastyrylǵan.

Kolledjder eń belsendi túrde ınjenerııa, aqparattyq-kommýnıkatsııalyq tehnologııalar (AKT), qyzmet kórsetý, bıznes jáne basqarý salalaryndaǵy baǵdarlamalardy daıyndaýda. Bul baǵdarlamalardy ázirleý úshin 500-den astam kásibı standart paıdalanyldy. Baǵdarlamalardy saraptaýǵa 540 sarapshy qatysty, olardyń 311-i — pedagog, 229-y — jumys berýshiler.

Jańa oqý jylynda taǵy da 3000 bilim berý baǵdarlamasyn ázirleý josparlanyp otyr.

Aıta ketelik myńǵa jýyq jas pedagog «Keleshek mektepterinde» jumys isteýge ótinim bergeni týraly jazǵan edik.