Jumysshy mamandyqtar jyly: qandaı ońtaıly nátıje boldy
ASTANA. KAZINFORM — 2025 jyl «Jumysshy mamandyqtar jyly» dep jarııalandy. Osy oraıda Eńbek jáne halyqty áleýmettik qorǵaý mınıstrligi byltyr jumysshy mamandyqtaryna qatysty qandaı ońtaıly nátıje bolǵany jaıynda túsinik berdi.
— Jumysshy mamandyqtar jylyn iske asyrý aıasynda memlekettik organdar jumysshy mamandyqtardyń qoǵamdyq mártebesin arttyrýǵa, olardyń eldiń turaqty áleýmettik-ekonomıkalyq damýyndaǵy negizgi rólin aıshyqtaýǵa jáne qoǵamda eńbek qundylyqtaryn nyǵaıtýǵa baǵyttalǵan keshendi júıelik sharalar ótkizdi. Osy jumystyń basty baǵyttarynyń biri — ekonomıkanyń strategııalyq mańyzdy salalarynda jumyspen qamtylǵan jumysshy kásipterdiń úzdik ókilderin marapattaý men kásibı merekelerdi atap ótý.
Kásibı merekelerge arnalǵan is-sharalar saltanatty marapattaý formatynda ótkizildi. Bul óz kezeginde jumysshylardyń salalardy damytýǵa qosqan úlesin kópshilikke tanystyryp qana qoımaı, qoǵamdyq sanada jumysshy mamandyqtardyń joǵary áleýmettilik mańyzy, olarǵa suranys joǵary ekenin jáne bolashaǵy týraly turaqty túsinik qalyptastyrdy, — delingen mınıstrliktiń Kazinform agenttigine bergen jaýabynda.
2025 jyly jumysshy mamandyqtarǵa arnalǵan jańa memlekettik nagradalardyń paıda bolýy erekshe mańyzǵa ıe boldy, bul eńbekti memlekettik yntalandyrý júıesindegi buryn-sońdy bolmaǵan qadam.
«Eńbek sińirgen geolog», «Qazaqstannyń eńbek sińirgen qurylysshysy», «Qazaqstannyń eńbek sińirgen kenshisi», «Qazaqstannyń eńbek sińirgen ónerkásip qaıratkeri» qurmetti ataqtary alǵash ret engizildi. Bul qadam jumysshy mamandyqtar ókilderiniń eldiń ónerkásiptik damýy men baǵalaıtynyn kórsetti.
— 2025 jyly jalpy 26 kásibı mereke atap ótildi, onyń aıasynda memlekettik jáne vedomstvolyq nagradalarmen 7,5 myńnan astam adam marapattaldy. Budan bólek, jumysshy mamandyqtardyń mártebesin kóterý jáne oqýshylar men stýdentter tarapynan olarǵa degen turaqty qyzyǵýshylyqty qalyptastyrý maqsatynda kásiporyndarda ashyq esik kúnderin jáne jumys berýshilerdiń qatysýmen bos oryndar jármeńkesin ótkizýdi qamtıtyn kásiptik baǵdarlaýdyń keshendi is-sharalary uıymdastyryldy. Ashyq esik kúnderi aıasynda jalpy bilim beretin mektepterdiń oqýshylary metallýrgııa, mashına jasaý, qurylys jáne jeńil ónerkásip kásiporyndarynyń, sondaı-aq qurylys materıaldaryn shyǵarý, shyny, polıgrafııa men aǵash óńdeý salalaryndaǵy uıymdardyń óndiristik protsesterimen jáne eńbek jaǵdaılarymen tikeleı tanysýǵa múmkindik aldy, — dep atalyp ótken vedomstvo aqparatynda.
Kásiptik baǵdarlaýdyń ishteı formattaryna qosymsha Eńbekmıni oqýshylar men TjKB stýdentterinde óz betinshe jumys izdeý jáne ózin kásiptik aıqyndaý daǵdylaryn qalyptastyrýǵa baǵyttalǵan tsıfrlyq quraldardy engizdi.
Atap aıtqanda, «Seniń mansaptyq bastamań: «Elektrondyq eńbek bırjasyn qalaı paıdalanýǵa bolady» onlaın kýrsy ázirlendi, sondaı-aq «Mansap kompasy» tsıfrlyq platformasynda oqýshylardy kásibı dıagnostıkalaý fýnktsııasy iske qosyldy.
2025 jyldyń qorytyndysy boıynsha 27 myń jumys berýshiniń qatysýymen 1,9 myń bos jumys orny jármeńkesi ótkizildi, sondaı-aq 4 347 kásiporyn «ashyq esik kúnderin» ótkizdi. Bos oryndar jármeńkeleri men ashyq esik kúnderine barlyǵy 250 myńǵa jýyq oqýshy men stýdent qatysty. Qosymsha «Seniń mansaptyq bastamań: «Elektrondyq eńbek bırjasyn qalaı paıdalanýǵa bolady» onlaın kýrsymen 527,7 myń oqýshy men stýdent qamtyldy, taǵy 100,7 myń oqýshy kásiptik dıagnostıkadan ótti.
Sonymen birge, salalyq memlekettik organdar jumysshy mamandyqtar boıynsha bilim berý júıesin eńbek naryǵymen sınhrondaýdy qamtamasyz etetin 100 kásiptik standartty ázirledi.
Aıta keteıik, Premer-mınıstrdiń orynbasary — Mádenıet jáne aqparat mınıstri Aıda Balaeva jumysshy mamandardy qoldaý jalǵasa beretinin málim etti.
Byltyr Prezıdent jarlyǵymen 1300-ge jýyq jumysshy mamandyq ókili memlekettik marapatqa ıe boldy.