Jumysshy mamandyqtar jyly: Astanada úzdik shashtaraz anyqtaldy
ASTANA. KAZINFORM — Astanada «Úzdik-2025» jobasy aıasynda qalalyq «Úzdik shashtaraz» baıqaýy ótti, dep habarlaıdy elorda ákimdiginiń resmı saıty.
«Úzdik-2025» jobasy Jumysshy mamandyqtar jyly aıasynda ótkizilip, jumysshy mamandyqtardyń bedelin arttyrýǵa jáne jastardyń kásibı áleýetin ashýǵa baǵyttalǵan. Baıqaý barysynda shashtarazdar tek óz sheberligin emes, sondaı-aq minezin, stılin jáne adamnyń kóńil kúıimen jumys isteı bilý qabiletin kórsetti.
— Shashtarazdyń jumysy názik talǵamdy, talantty jáne adamdarǵa muqııat qarym-qatynasty talap etedi, — dedi qatysýshylardyń biri.
Baıqaýdyń uıymdastyrýshysy — «Astana jastary» jastar resýrstyq ortalyǵy.
— Biz óte joǵary daıyndyq deńgeıin kórdik. Jas sheberler batyldyq, kreatıvtilik jáne óz kásibin tereń meńgergenin kórsetti. Bizdiń maqsat — tek úzdikti anyqtaý emes, jastardy ózderin damytyp, kúshine senýge shabyttandyrý. Jalpy, Jumysshy mamandyqtar jyly aıasynda elordada 15 baıqaý ótkizý josparlanǵan. Barlyq is-sharanyń qorytyndysy aı sońynda jarııalanady, — dedi ortalyq mamany Alýa Baltabaeva.
Bul keń aýqymdy baǵdarlama jas mamandardy qoldaýǵa, olardyń jańa múmkindikterin ashýǵa jáne qazirgi qoǵamdaǵy jumysshy mamandyqtardyń mańyzyn atap ótýge baǵyttalǵan. Baıqaý tájirıbe almasýdyń, tyń ıdeıalar men shyǵarmashylyq sheshimderdiń alańyna aınaldy.
Osydan buryn Astanada jasandy ıntellektiniń kómegimen jasalǵan alǵashqy spektakl qoıylǵanyn jazǵanbyz.