Jumysshy mamandyqtar jyly: Astanada úzdik eńbek maıtalmandaryna qurmet kórsetildi
ASTANA. KAZINFORM — Astanada Jumysshy mamandyqtar jyly men Eńbek kúnine arnalǵan saltanatty rásim ótti.
Іs-sharanyń basty maqsaty – «Eńbek joly» jáne «Paryz» baıqaýlarynyń óńirlik kezeńderiniń jeńimpazdaryn marapattaý, sondaı-aq óz salasynyń damýyna zor úles qosqan eńbek adamdaryn ulyqtaý boldy, dep jazdy elorda ákimdiginiń resmı saıty. Merekelik jıynǵa QR Eńbek jáne halyqty áleýmettik qorǵaý mınıstri Svetlana Jaqypova, Astana qalasy máslıhatynyń tóraǵasy Tabıǵat Zeınulqabden, qala ákiminiń orynbasary Erik Meıirhan, sondaı-aq Jumyspen qamtý jáne áleýmettik qorǵaý basqarmasynyń basshysy Ilıa Skýb qatysty.
Іs-shara barysynda eńbek ardagerleri men óndiris ozattaryna, jas mamandar men tálimgerlerge alǵys aıtyldy. Erekshe qurmet eńbek áýletteri men ustazdyq dástúrdi jalǵastyryp júrgen jandarǵa kórsetildi – olar jańa býyndy kásibı bilikti maman retinde qalyptastyrýǵa úles qosyp keledi.
– 2025 jyl Jumysshy mamandyqtar jyly dep jarııalandy. Bizdiń qoǵam men memlekettiń eń joǵary qundylyǵy – eńbek adamy. Mınıstrlik eńbekkerlerdiń qaýipsiz jumys isteýine, áleýmettik kepildikter men quqyqtaryn qorǵaýǵa baǵyttalǵan keshendi sharalardy júzege asyryp keledi. Elordada 700 myńnan astam maman eńbek etse, 150 myńnan astam eńbek ardageri turady – bul ózge óńirlerge úlgi, - dedi mınıstr Svetlana Jaqypova.
Jıynda eńbek áýletteri men jas mamandardy qoldaý, jańa jumys oryndaryn ashý jáne jumysshy mamandyqtardyń mártebesin kóterý elordanyń bolashaǵyn aıqyndaıtyn mańyzdy baǵyt ekeni aıtyldy.
Marapattaý rásimi áserli kontserttik baǵdarlamaǵa ulasyp, qatysýshylarǵa erekshe kóńil kúı syılady.
Aıta keteıik, Oljas Bektenov Prezıdent atynan jumysshy mamandyqtary ókilderine marapat tabystady.