Jumysshy mamandyqtar: 18 jastaǵy astanalyq aıyna jarty mln teńge tabady

ASTANA. KAZINFORM — Búginde kásiptik bilim alyp, eńbek naryǵyna erte aralasqan jastardyń sany artyp keledi. Olardyń biri – Astana qalasyndaǵy kásiptik tehnıkalyq kolledjdiń bıylǵy túlegi Kırıll Savelev.

Jas maman jýyrda ǵana dıplom alyp úlgerse de, qazirdiń ózinde elordadaǵy tanymal ashanalardyń birinde shef-kondıter bolyp jumys isteıdi.

Bar bolǵany on segiz jasqa tolǵan Kırıll qazirdiń ózinde tátti taǵamdar daıyndaýda tutynýshylardyń súıikti mamanyna aınalǵan. Ol ártúrli zamanaýı desertterdi, kondıterlik ónimderdi óz qolymen daıyndap, erekshe dámimen erekshelenip júr. Aıyna jarty mıllıon teńge kóleminde jalaqy alyp otyrǵan jas maman – eńbekqorlyqtyń, kásibı sheberliktiń jáne durys baǵyttaǵy mamandyq tańdaýdyń naqty úlgisi.

Kırılldiń bul salaǵa degen qyzyǵýshylyǵy bala kúninen bastaý alǵan. Úıde úlken ápkesiniń únemi táttiler pisirip júrgenin kórip ósken ol, erte jastan-aq aspazdyqqa qyzyǵýshylyq tanytyp, 16 jasynan bastap eńbekke aralasqan. Qazaq tilin jetik meńgergen jigit – kópultty qoǵamymyzdaǵy tatý ómir men mádenı úılesimdiliktiń dáleli.

Jas mamannyń jetistigine erekshe qýanyp júrgen jandardyń biri – kolledjdegi alǵashqy kýratory. Kırıll qazir dál sol ustazymen birge bir mekemede eńbek etip júr. Bul – ustaz eńbeginiń jemisi men shákirt pen ustaz arasyndaǵy úzilmeıtin baılanystyń kórinisi.
Kırıll aldaǵy ýaqytta joǵary oqý ornyna túsip, kásibı deńgeıin odan ári damytýdy kózdep otyr. Shetelge shyǵyp, álemdik deńgeıdegi kondıterlik mektepterde tájirıbe almasýdy maqsat etken ol – qazaq jastarynyń bilim men kásipti qatar ıgerip, eńbek naryǵyna erkin beıimdele alatynyn dáleldegen jas maman.

Kolledjdegi ustazdary Kırılldiń kásibı jáne adamgershilik qasıetterin erekshe atap ótedi.

«Jas maman retinde óz isine adal, sheberligi jyldan-jylǵa artyp keledi. Biz úshin Kırıll – úlgili túlek», – deıdi ustazdary.

Aıta keteıik, kolledjdermen áriptestik ornatqan kásiporyndar sany artty.