Jumysshy mamandyq ıelerine qaı salada kóp aılyq tóleıdi

ASTANA. KAZINFORM –  Premer-mınıstrdiń orynbasary Ermek Kósherbaev Senatta ótip jatqan parlamenttik tyńdaýda jumysshy mamandyq ıeleriniń aılyǵy týraly derekter keltirdi.

- Qazirgi tańda kásiptik-tehnıkalyq bilimi bar mamandardyń eń kóp sany saýdada júr – 856 myń adam. Ónerkásipte 670 myń, aýyl sharýashylyǵynda 559 myń, kólik jáne qoıma salasynda 419 myń adam kásiptik-tehnıkalyq bilimi boıynsha eńbek etip júr. Jumysshy kásipter arasynda ortasha jalaqynyń joǵary deńgeıi ónerkásipte – 588 myń teńge. Qarjy salasynda 531 myń teńge jáne kólik salasynda 403 myń teńge, - dedi ol.

Vıtse-premer el ekonomıkasynda 2,4 mln azamat jumysshy mamandyqtan nesibesin aıyryp júrgenin atap ótti.

- Azamattardy jumyspen qamtýdyń ósýine kásiptik-tehnıkalyq daıarlyq yqpal etedi. Sońǵy 10 jylda kásiptik-tehnıkalyq bilim bar qyzmetkerlerdiń úlesi jumyspen qamtylǵan jalpy halyqtyń 49 paıyzyna jetti. Ósim – 17 paıyz. 2030 jylǵa deıingi boljamdar boıynsha, 1,8 mln jas qazaqstandyq eńbek naryǵyna shyǵady. Olardy qajetti daǵdylarǵa baýlý mańyzdy. Elimizdiń birqatar óńirinde eńbekke qabiletti halyqtyń, ásirese jastardyń ketýi baıqalyp otyr. Bul strategııalyq mańyzdy salalarda jumys kúshiniń jetispeýine ákeledi, - dedi Ermek Kósherbaev.

Eske salsaq, Shyǵys Qazaqstan oblysyndaǵy toǵyz kásiporyn 304 jumysshysyna 150 mln teńge jalaqy tólemegeni málim bolǵan edi.