Jumysshy mamandardy qoldaý jalǵasa beredi — Aıda Balaeva
ASTANA. KAZINFORM — Jumysshy mamandardy qoldaý aldaǵy ýaqytta da jalǵasa beredi. Bul týraly Premer-mınıstrdiń orynbasary — Mádenıet jáne aqparat mınıstri Aıda Balaeva elordada ótken qorytyndy jıynda málimdedi.
Mınıstrdiń aıtýynsha, eńbek bedelin arttyrý, kásiptik bilim berý men tálimgerlikti damytý bastamalary árdaıym kún tártibinde.
— Kadrlyq áleýetti turaqty damytý jáne eńbek etýge laıyqty jaǵdaı jasaý negizgi basymdyqtardyń biri bolyp qala beredi. Tehnıkalyq jáne kásiptik bilim berý júıesin jańǵyrtý qarqyndy túrde jalǵasady. Jasandy ıntellekt engizilip jatqan joǵary tehnologııalyq óndiristerge mamandar daıarlaý basty nazarda bolmaq. Kolledjderge qabyldaýdy odan ári ulǵaıtý, kásiporyndar óndirisi boıynsha kadrlardy maqsatty daıarlaý turaqty jáne úzdiksiz túrde memleket tarapynan qoldaý tabady, — dedi Aıda Balaeva elordada Kongress ortalyqta.
Jastardyń jumysshy mamandyqtarǵa qyzyǵýshylyǵyn arttyrý úshin mektepten bastap aýqymdy kásiptik baǵdarlaý jumysy jalǵasady. Dýaldy oqytý deńgeıin damytý jáne arttyrý, bıznespen áriptestikti nyǵaıtý da jalǵasyn tabady.
Kadrlar daıarlaýdyń halyqaralyq standartyn engizý, stýdentter men pedagogterdiń akademııalyq mobıldigin arttyrý, qazaqstandyq kolledjder bazasynda halyqaralyq kásiptik bilim berý uıymdarynyń jańa fılıaldaryn ashý jalǵasady.
— Bizdiń strategııamyzdyń bir bóligi — tehnıkalyq jáne kásiptik bilim berý júıesi, pedagogterdiń kadrlyq áleýetin sapaly damytý. Memleket basshysy ekonomıkanyń turaqty damýy, ónerkásiptiń, qurylystyń, kóliktiń, energetıkanyń jáne agrarlyq sektordyń ósýi bilikti jumysshy kadrlardyń artýyna tikeleı baılanysty ekenin atap ótti. Aldaǵy bes jylda jumysshy mamandyqtar bıyl bastalǵan barlyq ınstıtýttsıonaldyq jańashyldyqtyń jalǵastyrý kezeńine aınalady, — dedi Aıda Balaeva.
Aıda Balaeva jumysshy mamandyqtar jyly bir jolǵy bastama emes, uzaq merzimdi, strategııalyq mańyzy zor bastama ekenin atap ótti.
— Jumysshy kadrlardy damytý boıynsha júıeli jumystyń bastalýy memlekettiń, bıznestiń, bilim berýdiń jáne qoǵamnyń ortaq jaýapkershiligin aıqyndady. Osy mindetterdi dáıekti iske asyrý, ekonomıkanyń jańa býynyn bilikti kadrlarmen qamtamasyz etýge jáne eldiń áleýmettik-ekonomıkalyq damýy úshin turaqty negiz qurýǵa múmkindik beredi. Osy oraıda óz isine adal kásibine jaýapkershilikpen qaraıtyn barsha eńbek adamdaryna zor alǵysymdy bildirgim keledi, — dedi spıker.
Aıta keteıik, elordada Jumysshy mamandyqtar jylyn qorytyndylaýǵa arnalǵan saltanatty is-shara ótip jatyr. Jumysshy maman retinde eńbekpen qamtylǵan jastar sany 1,2 mıllıonǵa jetken.