Jumysshy kadrlarǵa arnalǵan ıpotekalyq baǵdarlama iske qosý tapsyryldy

ASTANA. KAZINFORM — Premer-Mınıstr Oljas Bektenov Jumysshy mamandyqtar jylyn ótkizý boıynsha mınıstrlikterge tapsyrma berdi.

Onyń aıtýynsha, elimizge myńdaǵan bilikti jumysshy qajet jáne jyl saıyn jańa mamandyqtar paıda bolady.

— Sondyqtan bolashaqtaǵy daǵdy men quzyretterdi boljaý úshin barlyq ákimdikter kásipterdiń óńirlik atlasyn jasaýy qajet. Ázirge mundaı qujat tek 9 óńirde ǵana bar. Jastardyń jumysshy kásipterin sanaly túrde tańdaýy úshin kásiptik baǵdar berýde jańa tásilderdi júzege asyrý qajet. Bolashaq maman óziniń kásiptik perspektıvalaryn kórip otyrý úshin mektepter, kolledjder, kásiporyndar arasynda ózara is-qımyl modelin qurý kerek. Bul baǵytta Oqý-aǵartý mınıstrligi tehnıkalyq jáne kásiptik bilim berý salasyna sapaly ózgerister engizýi qajet, — dedi Premer-Mınıstr Úkimet otyrysynda.

Sondaı-aq, naryqta jańa maman ıelerine suranys joǵary bolýǵa tıis.

— Memleket tarapynan kolledjderde oqytýdy qarjylandyrý 2 ese ulǵaıtyldy. Halyqaralyq talaptarǵa saı jańa bilim berý baǵdarlamalary engizilýde. Bıznes, jumys berýshiler men ınvestorlar tarapynan da tıisti sharalar qabyldanýǵa tıis. Mundaı jumysty «Samuryq-Qazyna» qory belsendi júrgizýi kerek. Jumysshy kadrlardy áleýmettik qoldaýdyń úzdik korporatıvtik tájirıbesin keńinen taratyp, jańadan yntalandyrý sharalaryn engizý kerek, — dedi O. Bektenov.

Sonymen birge, Úkimet basshysy Ónerkásip, Energetıka, Kólik, Aýyl sharýashylyǵy, Sý resýrstary mınıstrlikterine kásiporyndarmen, ákimdiktermen jáne Otbasy bankimen birge jumysshy kadrlar úshin ıpotekalyq jáne jalǵa beriletin turǵyn úıdiń jeńildikti baǵdarlamalaryn iske qosýdy pysyqtaýdy tapsyrdy.

Buǵan deıin S. Jaqypova Qazaqstanda jumysshy mamandarǵa qajettilik tek qana arta beretinin aıtqan edi. 

Sondaı-aq, bıyl jumys berýshilerdiń suranysymen 12 myń adam kásiptik oqytýdan ótedi.