Jumyspen qamtý: bıyl 39,9 myń qazaqstandyq jumysqa ornalastyryldy
ASTANA. KAZINFORM — 2026 jylǵy 1 naýryzdaǵy jaǵdaı boıynsha jumyspen qamtýǵa járdemdesýdiń belsendi sharalarymen 46,9 myń adam qamtyldy, 39,9 myń qazaqstandyq jumysqa ornalastyryldy. Bul týraly Eńbek jáne halyqty áleýmettik qorǵaý mınıstrligi málim etti.
Sýbsıdııalanatyn jumys oryndaryna 20,3 myń adam jumysqa oranalasty, onyń ishinde: áleýmettik jumys oryndarynda 1,6 myń adam, jastar praktıkasynda 894 adam, qoǵamdyq jumystarda 16,5 myń adam, «Kúmis jas» jobasy aıasynda 1,2 myń adam jumyspen qamtyldy.
Jańa bıznes-bastamalardy júzege asyrý úshin halyqtyń áleýmettik osal sanatyna jatatyn azamattarǵa 400 AEK-ke deıin (1 730 000 teńge) 9 myń grant berý josparlandy.
Vedomstvonyń málimetinshe, eńbek naryǵyndaǵy suranysqa ıe daǵdylar boıynsha onlaın oqytýmen 13,2 myń jumyssyz qamtyldy, onyń ishinde 9,8 myńy oqýdy aıaqtap, sertıfıkat alǵan.
«Bastaý Bıznes» jobasy boıynsha kásipkerlik negizderine oqytýmen 6,9 myń adam qamtyldy, onyń ishinde 2,7 myń adam oqýdy aıaqtaǵan.
Kásiptik oqytýǵa 10 myń adam jiberý josparlanǵan.
Azamattardy jumysqa ornalastyrý birneshe baǵyt boıynsha júzege asyrylatynyn jáne shyn máninde jumysqa ornalasqandyǵy olar úshin mindetti zeınetaqy jarnalarynyń aýdarylýymen rastalatynyn atap ótken jón.
2026 jylǵy 1 naýryzda Elektrondyq eńbek bırjasynda jumys berýshiler ornalastyrǵan bos jumys oryndaryna 19,6 myń adam jumysqa ornalastyryldy.
Al byltyr Qazaqstan ekonomıkasynda 9 278,9 myń adam jumyspen qamtylǵany habarlandy.
