Jumyskerlerdiń quqyǵyn qorǵaý: 1 qyrkúıekte jańa komıtet qurylady
ASTANA. KAZINFORM - 2024 jylǵy 1 qyrkúıekten bastap QR Eńbek jáne halyqty áleýmettik qorǵaý mınıstrligi janynan Memlekettik eńbek ınspektsııasy komıteti jumys isteı bastaıdy. Bul týraly Memleket basshysynyń tapsyrmalaryn oryndaý jónindegi respýblıkalyq keńeste Eńbek jáne halyqty áleýmettik qorǵaý birinshi vıtse-mınıstri Aqmádı Sarbasov málimdedi.
Ol, sondaı-aq, eńbekti qorǵaýdy basqarýdyń ulttyq júıesin jańǵyrtý boıynsha júrgizilip jatqan jumystar týraly aıtty.
Sóz basynda Aqmádı Sarbasov eńbek qatynastary máseleleri erekshe baqylaýda ekenin atap ótti. Monıtorıng Eńbek táýekelderiniń tsıfrlyq kartasy arqyly júzege asyrylady.
Vıtse-mınıstr, sondaı-aq, jumyskerlerdiń quqyqtarynyń saqtalýyna memlekettik baqylaýdy kúsheıtý týraly aıtty – bıyl jumys berýshilerdi tekserý 7% - ǵa ósti.
Sonymen qatar, ol laıyqty eńbek jaǵdaılaryn qamtamasyz etý, onyń ishinde buzýshylyqtardy anyqtaý jáne joıý, jalaqy boıynsha bereshekti jáne óndiristik jaraqattaný deńgeıin tómendetýge baǵyttalǵan sharalar boıynsha júrgizilip jatqan jumystar týraly habarlady.
Vıtse-mınıstr eńbekti qorǵaýdy basqarýdyń ulttyq júıesin jańǵyrtý boıynsha júrgizilip jatqan jumystarǵa egjeı-tegjeıli toqtaldy.
«Qazaqstanda tsıfrlyq sheshimder men negizgi bıznes-protsesterdi avtomattandyrýdy qosa alǵanda, qaýipsiz jáne salaýatty jumys ortasyn qamtamasyz etý boıynsha júıeli sharalar iske asyrylýda. 2025 jyldan bastap kásibı táýekelderdi ıntegraldy baǵalaý rásimine tolyq aýqymdy kóshý jáne tsıfrlyq quraldar men aspaptardy qoldanýǵa basa nazar aýdara otyryp, arnaıy uıymdarǵa qoıylatyn talaptardy kúsheıtý josparlanýda.
Jeke qorǵanys quraldaryn tańdaýdyń jáne áleýmettik kepildikter berýdiń táýekelge baǵdarlanǵan jáne proaktıvti tetikteri engiziletin bolady. Úsh taraptyń – memlekettiń, jumys berýshiniń jáne jumyskerdiń eńbek jaǵdaılaryn jaqsartýǵa tartylýyn qamtamasyz etýge baǵyttalǵan sharalar kesheni qabyldanatyn bolady, bul jumys kúshiniń sapasyn arttyrýǵa jáne eńbek resýrstaryn únemdeýge oń áser etedi», – dedi Aqmádı Sarbasov.
Ol, sondaı-aq, shtat kestesin aýystyrý men eńbek jáne ujymdyq sharttardy elektrondyq formatqa jasasý, «Kásipodaqtardyń avtomattandyrylǵan jumys orny» aqparattyq modýlin engizý arqyly eńbek qatynastaryn deklaratsııalaý boıynsha qabyldanyp jatqan sharalar týraly aıtyp berdi.
Qorytyndylaı kele, Aqmádı Sarbasov 2024 jylǵy 6 tamyzda QR Úkimetiniń Memlekettik eńbek ınspektsııasy komıtetin (budan ári – Komıtet) jáne onyń aýmaqtyq departamentterin qurý týraly qaýlysy qabyldanǵanyn baıandady.
«Komıtet pen onyń aýmaqtyq departamentterin qurý, shtattardy jasaqtaý jumystary tamyz aıynda aıaqtalady. 1 qyrkúıekten bastap memlekettik eńbek ınspektorlary shtattyq rejımde jumys isteıdi. Tamyz aıynyń sońyna deıin Komıtet pen jergilikti atqarýshy organdar barlyq qajetti zańdyq jáne tehnıkalyq rásimderdi aıaqtaıtyn bolady.
Bul eńbek zańnamasynyń saqtalýyna jáne jumyskerlerdiń eńbek quqyqtaryn qorǵaýǵa memlekettik baqylaýdy kúsheıtýge múmkindik beredi», – dep túıindedi óz sózin vıtse-mınıstr.
