Jumysker quqyǵyn qorǵaý kúsheıtildi: Jańa zańdaǵy negizgi ózgerister qandaı
ASTANA. KAZINFORM – Búgin Prezıdent eńbek jaǵdaılaryn jetildirýge qatysty zańǵa qol qoıdy. Zań avtorlarynyń biri, Májilis depýtaty Ashat Aımaǵambetov qujattaǵy negizgi ózgeristerdi túsindirdi.
Basty ózgeristerdiń biri – jumysta naqty eńbek qatynastarynyń belgileri baıqalsa, azamattyq-quqyqtyq shart qoldanýǵa tyıym salynady.
– Kóptegen jumys berýshiler áleýmettik tólemderden jaltarý maqsatynda eńbek shartynyń ornyna azamattyq-quqyqtyq shart jasasýdy ádetke aınaldyryp kelgen. Nátıjesinde qyzmetkerler demalyssyz, emdemaqysyz jáne zeınetaqy jarnasyz qalatyn. Jańa zańǵa sáıkes, eger jumysta naqty eńbek qatynastarynyń belgileri baıqalsa, azamattyq-quqyqtyq shart qoldanýǵa tyıym salynady. Bul myńdaǵan qazaqstandyqqa áleýmettik kepildikterdi qamtamasyz etýge múmkindik beredi, – dep jazdy depýtat óziniń Telegram-paraqshasynda.
Bul rette azamattyq-quqyqtyq shart tek bir rettik nemese naqty nátıjege baǵyttalǵan jumystar úshin ǵana saqtalady. Mysaly, saıt jasaý, keńse jóndeý, aýdarma qyzmeti nemese bir rettik trenıng ótkizý sııaqty is-sharalarda qoldanylady.
Sonymen birge, depýtattyń pikirinshe, bir kásiporynda, bir laýazymda otyrǵan sheteldik pen jergilikti mamannyń jalaqysynda jer men kókteı aıyrmashylyq bolmaýy tıis. Endi ujymdyq shartta bir laýazym boıynsha eń tómengi jáne eń joǵary jalaqynyń araqatynasy naqty belgilenedi.
Odan bólek, jumysshyny «kináli» qylyp shyǵarýǵa jol berilmeıdi. Qyzmetkerdiń «abaısyzdyǵy» bolǵan kúnniń ózinde, onyń jaýapkershiligi 25 paıyzdan aspaıtyn boldy. Bul jumys berýshini qaýipsizdikti kúsheıtýge mindetteıdi.
– Endi jazataıym oqıǵany tergeý ashyq bolady. Qazir óndiristegi jaraqatty jumys berýshiniń ózi qurǵan komıssııa tekseredi. Bul sýbektıvti sheshimderge alyp keletin. Jańa zań boıynsha, komıssııa quramyna táýelsiz medıatorlar, advokattar nemese zardap shegýshiniń týystary qatysa alady. Jaraqat dárejesin anyqtaýdyń biryńǵaı standarty da eskirgen. Búginde dárigerler 1994 jylǵy eskirgen usynystardy qoldanady. Sonyń kesirinen bir jaraqat bir jerde «aýyr», ekinshi jerde «jeńil» dep baǵalanýy múmkin. Osy sebepti Densaýlyq saqtaý mınıstrligi halyqaralyq standartqa saı (Frantsııa, Kanada úlgisimen) biryńǵaı qaǵıdalar bekitedi. Ótemaqy ádil tólenýi qajet, – deıdi A. Aımaǵambetov.
Aıta keteıik, Astanada eńbekti qorǵaýǵa arnalǵan halyqaralyq konferentsııa jáne kórme ótedi.
