Jumysker eńbek shartynda kózdelmegen fýnktsııalardy oryndaýdan bas tartýǵa quqyly

ASTANA. KAZINFORM – Jumysker eńbek shartynda kózdelmegen fýnktsııalardy oryndaýdan bas tartýǵa quqyly. Bul týraly Májilis depýtattarynyń saýalyna Premer-mınıstrdiń orynbasary Ermek Kósherbaevtyń jaýabynda aıtylǵan.

— Eńbek kodeksine sáıkes, jumysker óz mindetterin kelisimderge, eńbek jáne ujymdyq sharttarǵa, jumys berýshiniń aktilerine sáıkes oryndaýǵa mindetti. Aǵymdaǵy jóndeý jumystary jumyskerdiń eńbek mindetterine kiretin bolsa (taraptardyń eńbek sharty men kelisimde ózgeshe belgilenbese), qosymsha tólemder kózdelmeıdi. Jumysker óziniń eńbek shartynda kózdelmegen fýnktsııalardy oryndaýǵa tartylsa, ol olardy oryndaýdan bas tartýǵa quqyly. Jumys berýshiniń jumyskerdiń kelisiminsiz eńbek mindetterin birjaqty ózgertýge nemese keńeıtýge quqyǵy joq, — dedi vıtse-premer. 

Onyń atap ótýinshe, bir uıym aıasynda qosymsha jumys qosymsha aqy tóleýge jatady. 

— Mundaı tapsyrmanyń nusqalaryna mynalar jatady — laýazymdardy qosa atqarý (basqa bos laýazym boıynsha qosymsha jumysty oryndaý); qyzmet kórsetý aımaqtaryn keńeıtý (jumys kúni (aýysym) sheginde jumys kólemin ulǵaıtý); ýaqytsha bolmaǵan qyzmetkerdiń mindetterin oryndaý (basqa jáne uqsas laýazym boıynsha fýnktsııalardy oryndaý). Osylaısha, eger tehnıkalyq jumysker óziniń eńbek mindetterinde kózdelmegen aǵymdaǵy jóndeý jumystaryna tartylsa, ol qosymsha aqy alýǵa quqyly. Jumys berýshi qosymsha aqy tóleýden zańsyz bas tartqan jaǵdaıda, jumysker memlekettik eńbek ınspektsııasyna júginýge quqyly, — dedi Ermek Kósherbaev.

Buǵan deıin 10 óńir ákimdigi azamattyq qyzmetshilerdiń jalaqysyn arttyrý quqyǵyn paıdalanbaı otyrǵanyn jazǵan edik.