Jumysqa keshikken qyzmetkerdiń jalaqysynan aıyppul ustaýǵa bola ma
ASTANA. KAZINFORM – Qazaqstanda jumys berýshiniń qyzmetkerge jumysqa keshikkeni, qatelik jibergeni nemese eńbek tártibin buzǵany úshin aqshalaı aıyppul salýǵa quqyǵy joq, dep habarlaıdy Eńbek jáne halyqty áleýmettik qorǵaý mınıstrligi.
Vedomstvonyń túsindirýinshe, jumys berýshi qyzmetkerden eńbek tártibin, ishki tártip qaǵıdalaryn saqtaýdy jáne qyzmettik mindetterin tıisinshe oryndaýdy talap ete alady. Alaıda tártip buzǵany úshin aqshalaı aıyppul salý eńbek zańnamasynda kózdelmegen.
Eńbek kodeksiniń 64-babyna sáıkes, qyzmetker eńbek tártibin buzǵan jaǵdaıda oǵan eskertý, sógis, qatań sógis berilýi nemese zańda kózdelgen negizder boıynsha eńbek sharty buzylýy múmkin.
– Eńbek kodeksinde jáne Qazaqstan Respýblıkasynyń zańdarynda qarastyrylmaǵan basqa tártiptik jazalardy qoldanýǵa jol berilmeıdi, – dep túsindirdi mınıstrlik.
Máselen, qyzmetker jumysqa 20 mınýt keshigip kelse, jumys berýshi oǵan óz betinshe 10 myń teńge aıyppul salyp, bul somany jalaqysynan ustap qala almaıdy.
Mundaı jaǵdaıda jumys berýshi zańdy negiz bolǵan kezde ǵana belgilengen tártipke sáıkes tártiptik jaza qoldana alady.
Sonymen qatar tártiptik jaza taǵaıyndar aldynda qyzmetkerden jazbasha túsinikteme talap etilýi tıis. Jaza túrin tańdaǵanda tártip buzýshylyqtyń sıpaty, aýyrlyǵy jáne onyń qandaı jaǵdaıda jasalǵany eskeriledi.
Mınıstrlik zańsyz aqshalaı aıyppul men zańda kózdelgen jalaqydan ustalym jasaýdyń aıyrmashylyǵyn da túsindirdi.
Eńbek kodeksiniń 115-babynda jalaqydan qandaı jaǵdaılarda ustalym jasaýǵa bolatyny kórsetilgen. Al keıbir ózge jaǵdaılarda qyzmetkerdiń jazbasha kelisimi qajet.
ıAǵnı jumys berýshi eńbek tártibin buzǵany úshin kózdelgen jazalardy aqshalaı aıyppulmen almastyra almaıdy.
Vedomstvo eńbek zańnamasyn saqtaý jumys berýshiler úshin de, qyzmetkerler úshin de mindetti ekenin eske saldy.
Aıta keteıik, buǵan deıin Qazaqstanda jumys berýshiniń eńbek shartynda kózdelgenimen, qyzmetkerge zańda joq aqshalaı aıyppul salýǵa quqyǵy joq ekeni túsindirilgen edi. Eńbek shartyndaǵy mundaı talapqa qol qoıǵan qyzmetker de zańsyz ustalǵan jalaqysyna qatysty daý aıtý quqyǵynan aıyrylmaıdy.
