Jumysqa qabyldaý bastaldy: LRT júıesine qyzmetkerler iriktelip jatyr

ASTANA. KAZINFORM – «City Transportation Systems» JShS Astanadaǵy jeńil relsti kólik (LRT) júıesinde jumys isteý úshin qyzmetkerlerdi qabyldaý bastalǵanyn habarlady.

Kompanııa myna laýazymdarǵa úmitkerler izdeıdi:

1. Stantsııalardyń aýysym basshylary;

2. Stantsııa kezekshileri;

3. Jyljymaly quram ortalyǵynyń qozǵalys dıspetcherleri;

4. Jyljymaly quram ortalyǵynyń ortalyqtandyrý beketiniń dıspetcherleri;

5. LRT jabdyqtary men ınfraqurylymyn basqarý ortalyǵynyń dıspetcherleri;

6. Dabyl tehnıkteri;

7. Baılanys tehnıkteri;

8. Elektr monterleri;

9. Jol jóndeý ýchaskesiniń sheberleri;

10. Jabdyqtardy jóndeý slesarlary;

11. Qoıma meńgerýshileri.

- LRT júıesinde jumys isteıtin bolashaq mamandardy oqytý jumys berýshi esebinen júrgiziledi. Teorııalyq jáne praktıkalyq daıyndyq Qazaqstanda jáne Qytaı Halyq Respýblıkasynda ótedi. Kýrstyń uzaqtyǵy mamandyqqa baılanysty - 4-6 aı. Baǵdarlama aıaqtalǵan soń qatysýshylarǵa halyqaralyq úlgidegi sertıfıkat tabystalyp, barlyǵy LRT bólimshelerine jumysqa ornalastyrylady, - delingen aqparatta.

Úmitkerlerge qoıylatyn talaptar:

– kólik, mashına jasaý, elektr tehnıkasy nemese tıisti salalar boıynsha joǵary nemese orta-arnaýly bilim;
– keminde 2 jyl jumys tájirıbesi.

Tolyq biliktilik talaptary cts.gov.kz saıtynda jarııalanǵan. Túıindemeler osy saıt arqyly qabyldanady.

Aıta keteıik, Astanada LRT jelisi Qosshyǵa qaraı uzartylady.