Jumysyna salǵyrt qaraǵan «Qazsýshar» fılıaldarynyń basshylary jazalandy

ASTANA. KAZINFORM — Sý resýrstary jáne ırrıgatsııa mınıstrligi «Qazsýshar» fılıaldary basshylaryn baqylaýdyń jetkiliksizdigi men jumystyń durys uıymdastyrylmaǵany úshin jazalady. Bul týraly vedomstvonyń baspasóz qyzmeti málim etti. 

 Mınıstrliktiń málimetinshe, sógis jarıalanǵan basshylar kúrish sýarý úshin sýdy zańsyz paıdalnaǵan ári ylǵaldy kóp qajet etetin daqyldardy shamadan tys ekken.  

Sý resýrstary jáne ırrıgatsııa mınıstrligi «Qazsýshardyń» Qyzylorda jáne Túrkistan oblystaryndaǵy fılıaldarynyń dırektorlaryna, sondaı-aq Túrkistan fılıalynyń Maqtaaral jáne Shardara óndiristik bólimsheleriniń basshylary men Jetisaı óndiristik bólimshe basshysynyń orynbasaryna qatań sógis jarııalady. 

— Túrkistan oblysynda kúrish egý jospary 4,7 ese artyq oryndalǵan. Memleket basshysynyń 2024–2028 jyldarǵa arnalǵan aýyl sharýashylyǵynyń jalpy ónim kólemin eki esege ulǵaıtý tapsyrmasyn oryndaý jónindegi Jol kartasyna sáıkes, bıyl bul aımaqta kúrish alqabynyń kólemi 2 800 gektardan aspaýy tıis edi. Alaıda naqty egis kólemi 13 258 gektarǵa jetken, — delingen habarlamada. 

Sýarmaly sýdyń jetispeýshiligi qaýpine qaramastan, jergilikti «Qazsýshar» fılıaly sharýalarmen kúrish alqabyn sýarý týraly kelisimsharttardy belsendi túrde jasasqan. Atap aıtqanda, Jetisaı óndiristik bólimshesi — 1 528 gektar alqapty sýarý úshin 77 kelisimshart, Shardara óndiristik bólimshesi — 6 453 gektarǵa 499 kelisimshart, al Maqtaaral óndiristik bólimshesi — 5 277 gektar kúrish alqabyn sýarýǵa 471 kelisimshart jasaǵan.

Qyzylorda oblysynda Sý resýrstary jáne ırrıgatsııa mınıstrliginiń jumys toby 126 sharýa qojalyǵynyń jergilikti «Qazsýshar» fılıalymen kelisimshartsyz 4 908 gektar kúrish alqabyn sýarǵanyn anyqtady.

—Tekserý júrgizilgenge deıin bul sharýashylyqtar ruqsatsyz shamamen 52 mln tekshe metr sý paıdalanǵan. Mundaı zańsyz sý alý jaǵdaılary qosymsha 180 mln tekshe metr sý qajettiligin týdyryp otyr. Bul rette sý alý kólemi ruqsat etilgen shekten 220 mln tekshe metrge artyp ketý qaýpi bar, dep habarlady vedomstvodan.

Sýdy zańsyz paıdalaný jáne «Qazsýshar» fılıaldary basshylary tarapynan ylǵaldy kóp qajet etetin daqyldardy azaıtý boıynsha baqylaýdyń jetkiliksiz bolýy sý resýrstaryna úlken salmaq túsirip otyr. Bul óz kezeginde zańdy kelisimshart boıynsha sý alyp otyrǵan adal tutynýshylardyń jaǵdaıyn qıyndatady.

Qazaqstannyń ońtústiginde sýarý maýsymy bıyl 20 kúnge erte bastalǵanyn eske sala keteıik. Buǵan sebep — aýa temperatýrasynyń joǵary bolýy men jaýyn-shashynnyń bolmaýy. Osyǵan baılanysty óńirde sýarmaly sýdy ádil bólýdi qamtamasyz etý maqsatynda egis alqaptaryn kezekpen sýarý jumystary júrgizilip jatyr.

Qazirgi tańda elimizdiń ońtústigindegi bes óńirde aýyl sharýashylyǵy qajettiligine alynǵan sý kólemi shamamen 7 mlrd tekshe metr. Onyń ishinde Túrkistan oblysy — 2,82 mlrd tekshe metr, Qyzylorda oblysy — 2,5 mlrd tekshe metr, Almaty oblysynda bul kórsetkish 527 mln tekshe metrden astam, Jetisý oblysynda — 631,7 mln tekshe metr, al Jambyl oblysynda — 512 mln tekshe metr.

Eske sala keteıik, buǵan deıin Tarazda 130 gektardan astam jer zańsyz sýarylǵany anyqtalǵanyn jazǵan bolatynbyz.