Jumys izdeý jeńildeıdi: jańa júıe iske qosylady

ASTANA. KAZINFORM – Qazaqstanda jumyspen qamtý júıesi jańaryp, azamattarǵa jumys tabýdy jeńildetetin jańa tásil engizildi. Bul týraly QR Eńbek jáne halyqty áleýmettik qorǵaý vıtse-mınıstri Bahtııar Jazyqpaev Ortalyq kommýnıkatsııalar qyzmetinde ótken brıfıngide málimdedi.

Onyń aıtýynsha, búginde jumyspen qamtýǵa qatysty barlyq qyzmet elektrondy formatqa kóshirilgen. Endi kelesi qadam – azamattarǵa jumysty ózdiginen usynatyn jańa júıege kóshý.

– Jańa tásil boıynsha memleket azamattyń ótinish berýin kútpeıdi. Júıe adamnyń bilimi, mamandyǵy men eńbek tájirıbesine qaraı laıyqty jumys nusqalaryn ózi usynady, - dedi ol.

Vıtse-mınıstrdiń sózinshe, bul júıe naqty ýaqyt rejıminde jumys isteıdi. Azamattyń derekteri taldanyp, soǵan sáıkes bos jumys oryndary usynylady.

– Eger adam jumysynan aıyrylsa, ol ótinish bermeı-aq, júıe oǵan jańa jumys nusqalaryn joldaıdy. Bul jumyspen qamtý protsesin jedeldetedi, - dedi Bahtııar Jazyqpaev.

Sonymen qatar ınternet arqyly jumys isteıtin azamattar da osy júıege qosylyp jatyr. Qazir mundaı platformalar arqyly 395 myńnan astam adam eńbek etedi.

– Osy baǵytta zeınetaqy, áleýmettik jáne medıtsınalyq saqtandyrýǵa 10,7 mlrd teńgeden astam qarajat aýdaryldy. Bul azamattardyń áleýmettik qorǵalýyn kúsheıtedi, - dedi ol.

Budan bólek, stýdentterdiń óndiristik tájirıbesi de tolyq tsıfrlyq formatqa kóshirildi. Endi barlyq protsess onlaın júrgiziledi. Qazir júıede 17 myńnan astam stýdent tirkelip, shamamen 6 myń elektrondyq kelisimshart jasalǵan. 

Vıtse-mınıstrdiń aıtýynsha, jańa júıe jumys tabýdy jeńildetip qana qoımaı, eńbek naryǵyn ashyq ári tıimdi etýge múmkindik beredi. 

Aıta keteıik, 2026 jylǵy 1 naýryzdaǵy jaǵdaı boıynsha jumyspen qamtý sharalary arqyly 39,9 myń qazaqstandyq turaqty jumysqa ornalastyryldy.