Jumys izdep júrsiz be: Qazaqstanda tegin oqyp, grant alyp, jańa kásip bastaýǵa bolady

ASTANA. KAZINFORM – Qazaqstanda jumysynan aıyrylǵan nemese jańa jumys izdep júrgen azamattarǵa bos jumys oryndaryn tabý, kásiptik bilim alý, biliktiligin rastaý, memlekettik qoldaý sharalaryn paıdalaný jáne jeke kásip ashý úshin birqatar tsıfrlyq servıs qoljetimdi, dep habarlady Eńbek jáne halyqty áleýmettik qorǵaý mınıstrligi.

v
Foto: Eńbek mınıstrligi

Vedomstvo jumys izdeý, kásibı damý, kásipkerlikti qoldaý jáne jumyspen qamtýǵa járdemdesýdiń basqa da tetikterin biriktiretin Enbek tsıfrlyq ekojúıesin damytýda. Qajetti qyzmetterdi onlaın alýǵa nemese mansap ortalyǵyna júginýge bolady.

Jumys izdeýdi neden bastaǵan jón?

Enbek.kz Elektrondyq eńbek bırjasynda jáne Enbek mobıldi qosymshasynda azamattar jeke kabınetin ashyp, túıindemesin ornalastyra alady, ózine qolaıly bos jumys oryndaryn tańdap, jumys berýshilerge ótinim jiberedi.

Sondaı-aq bul platformalar arqyly jumys izdeýshi retinde tirkelip, keıinnen jumyssyz mártebesin proaktıvti túrde alýǵa bolady.

Zańnamada kózdelgen talaptarǵa sáıkes kelgen jaǵdaıda azamat jumysynan aıyrylýyna baılanysty áleýmettik tólem alýǵa ótinim bere alady.

Jasandy ıntellekt qandaı kómek kórsetedi?

Qosymsha múmkindikterdi Enbek.kz platformasy negizinde Eńbek mınıstrligi engizip jatqan Tsıfrlyq jumyspen qamtý qyzmeti usynady.

Azamattyń kelisimimen memlekettik aqparattyq júıelerdegi málimetter negizinde onyń bilimi, eńbek ótili men kásibı daǵdylary qamtylǵan tsıfrlyq túıindemesi avtomatty túrde qalyptastyrylady.

Jasandy ıntellekt jumys izdeýshiniń biliktiligi men qalaýyn eskere otyryp, oǵan sáıkes keletin bos jumys oryndaryn irikteýge kómektesedi.

– Jasandy ıntellekt kómekshisi dıalog formatynda jumys isteıdi jáne azamatqa ózine qolaıly jumys nusqalaryn óz betinshe tańdaýǵa múmkindik beredi. Mysaly, úıine jaqyn jerdegi jumysty izdeýge, basqa óńirlerdegi usynystardy qaraýǵa, qalaǵan jalaqy mólsherin kórsetýge nemese oqý múmkindikteri men memlekettik qoldaý sharalary boıynsha usynystar alýǵa bolady, – delingen mınıstrlik aqparatynda.

Qosymsha bilim alý qajet bolsa, qandaı múmkindikter bar?

Biliktiligin arttyrǵysy nemese jańa daǵdylardy meńgergisi keletin azamattar Skills Enbek platformasynda tegin onlaın kýrstardan óte alady.

Jumyssyz retinde tirkelgen azamattarǵa bilim berý uıymdarynda nemese tikeleı jumys berýshiniń jumys ornynda qysqa merzimdi kásiptik oqýdan ótý múmkindigi de qarastyrylǵan.

Al ózinde bar kásibı daǵdylardy resmı túrde rastaǵysy keletin azamattar belgilengen talaptarǵa sáıkes Career Enbek platformasy arqyly kásiptik biliktilikti taný rásiminen tegin ótýge arnalǵan vaýcher alýǵa ótinim bere alady.

Óz kásibińizdi ashqyńyz kelse, ne isteý kerek?

Kásipkerlikpen aınalysýdy josparlaǵan azamattarǵa Business Enbek platformasy qoljetimdi.

Bul platforma arqyly azamattar «Bastaý Bıznes» jobasy boıynsha kásipkerlik negizderine oqýǵa qoıylatyn talaptarǵa sáıkestigin teksere alady.

Sonymen qatar belgilengen talaptarǵa saı kelgen jaǵdaıda jáne ótinim qabyldaý kezeńinde óz bıznes-jobasyn júzege asyrý úshin memlekettik grant alýǵa ótinim bere alady.

Budan bólek, platforma arqyly aýyldyq eldi mekender men shaǵyn qalalarda kásipkerlikti damytýǵa baǵyttalǵan «Aýyl amanaty» baǵdarlamasy sheńberinde mıkrokredıt alý jáne lızıng rásimdeýge ótinim berý múmkindigi qarastyrylǵan.

Qazirgi ýaqytta bul ótinim berý servısi Almaty, Qyzylorda, Mańǵystaý jáne Batys Qazaqstan oblystarynda pılottyq rejımde júzege asyrylyp jatyr.

Óz óńirińizde laıyqty jumys tabylmasa she?

Azamattar elimizdiń basqa óńirlerindegi bos jumys oryndaryn da qarastyra alady.

Onyń ishinde eńbek kúshi tapshy óńirlerge erikti túrde qonys aýdaryp, memleket tarapynan kózdelgen qoldaý sharalaryn paıdalaný múmkindigi bar.

Migration Enbek platformasy arqyly qonys aýdarý máseleleri boıynsha keńes alý úshin mansap ortalyǵyna ótinim joldaýǵa bolady.

Jeke kómek alý úshin qaıda júginýge bolady?

Eger azamat óz betinshe jumys taba almasa, turǵylyqty jeri boıynsha mansap ortalyǵyna júgine alady.

Mamandar jumys izdeýshi retinde tirkelýge kómektesip, jumyssyz mártebesin alý tártibin túsindiredi, laıyqty bos jumys oryndaryn usynady, jumyspen qamtýǵa járdemdesýdiń qoljetimdi sharalary týraly aqparat berip, jumys berýshimen suhbattasýǵa daıyndalýǵa kómektesedi.

Tsıfrlyq jumyspen qamtý qyzmeti aıasynda engizilgen jańa tásil boıynsha azamattarǵa kórsetiletin kómek bir rettik konsýltatsııamen shektelmeıdi.

Árbir jumys izdeýshige jeke maman bekitilip, ol jumys izdeýdiń ár kezeńinde azamatty súıemeldeıdi, jumys berýshilermen baılanys ornatady jáne aldaǵy is-qımyldardy aıqyndaýǵa kómektesedi.

Jumysqa ornalasýǵa járdem alýdyń alǵashqy qadamy – Enbek.kz platformasynda tirkelý nemese mansap ortalyǵyna barý.

Ár azamat óziniń qajettiligine qaraı jumys izdeý, jańa mamandyq meńgerý, kásibı biliktiligin rastaý, basqa óńirge qonys aýdarý nemese jeke kásibin bastaý múmkindikterin paıdalana alady.

Aıta keteıik, buǵan deıin elimizde jumysqa ornalastyrýdyń jańa tásili engizilip jatqany habarlanǵan bolatyn. Tsıfrlyq jumyspen qamtý qyzmeti 2026 jylǵy shildeden bastap Pavlodar jáne Mańǵystaý oblystarynda iske asyrylyp, osy ýaqyt ishinde 59,2 myń azamatqa qoldaý kórsetilgen. Onyń 7,5 myńy jumysqa ornalasqan.