Jumys, tabys, ınfraqurylym: Joldaýdaǵy bastamalar jastarǵa ne beredi
QARAǴANDY. KAZINFORM — Qaztutynýodaǵy Qaraǵandy ýnıversıtetinde Quryltaı depýtattary, memlekettik organdardyń ókilderi, Qazaqstan Halyq Keńesiniń músheleri men qoǵam ókilderi stýdenttermen kezdesti.
Basqosýda Memleket basshysy Qasym-Jomart Toqaevtyń Joldaýynda kóterilgen bastamalar men el damýynyń jańa kezeńinde júzege asyrylýy tıis mindetter sóz boldy.
Quryltaıdyń Áleýmettik-mádenı damý komıtetiniń tóraǵasy Ashat Aımaǵambetov sońǵy jyldary qolǵa alynǵan aýqymdy saıası reformalar, jańa Konstıtýtsııanyń qabyldanýy jáne memlekettik basqarý júıesiniń jańǵyrýy eldegi ózgeristerdiń kelesi kezeńine negiz qalaǵanyn atap ótti. Endigi kezekte osy ózgeristerdiń ıgiligin ár azamat sezinetindeı naqty nátıjelerge qol jetkizý mańyzdy.
— Búginde jastardyń aldynda zor múmkindikter ashylyp otyr. Memleket sol múmkindikterdi júzege asyrýǵa qajetti jaǵdaı jasap keledi. Al Prezıdent Joldaýynda el damýynyń strategııalyq baǵdary aıqyndalǵan. Qazir eń bastysy — saıası jáne ınstıtýtsıonaldyq ózgeristerdi ár azamattyń kúndelikti ómirinen kórinis tabatyn naqty nátıjelermen bekemdeý, — dedi Ashat Aımaǵambetov.
Eńbek jáne halyqty áleýmettik qorǵaý vıtse-mınıstri Baqtııar Jazyqbaev «halyqtyq tsıfrlyq ekonomıka» tujyrymdamasynyń negizgi baǵyttaryna toqtaldy. Bul tujyrymdama tsıfrlyq sheshimder men jasandy ıntellekt tehnologııalaryn keńinen engizýdi kózdeıdi. Sonymen qatar eńbek naryǵynda jańa múmkindikter qalyptastyryp, azamattardyń jumysqa ornalasýyna, kásipkerlikpen aınalysýyna jáne tabysyn arttyrýyna jol ashady.
Kezdesýde «Halyqtyq qurylys» baǵdarlamasyna da erekshe nazar aýdaryldy. Qatysýshylar joldar men ınjenerlik-kommýnıkatsııalyq jelilerdi jańartý, áleýmettik nysandardy salý jáne jóndeý máselelerin talqylady. Jobalardy belgilengen merzimde júzege asyrýmen qatar, bıýdjet qarajatynyń maqsatty ári ashyq jumsalýyn qamtamasyz etý, bul úderiske qoǵamdyq baqylaýdy kúsheıtý qajettigi de atap ótildi.
Basqosý sońynda spıkerler stýdentterdiń saýaldaryna jaýap berip, pikir almasty.
Osydan buryn Qaraǵandy, Temirtaý jáne Balqash qalalarynyń tsıfrlyq egizderin jasap, olardyń damý josparlaryn ázirleý kózdelip otyrǵanyn jazdyq. Bul mindet Memleket basshysynyń Joldaýyn júzege asyrý aıasynda Qaraǵandy oblysynda qolǵa alynatyn basym baǵyttardyń biri retinde belgilendi.