Jumys isteıtin áıelderdiń dekrettik tólemi saqtalady — depýtat
ASTANA. KAZINFORM — Quryltaı depýtaty Lázzat Qojahmet 2027 jyldyń 1 qańtarynan bastap kúshine enetin áleýmettik járdemaqylar saıasaty týraly túsindirdi.
Onyń aıtýynsha, jumys istep júrip bala bosanǵan áıelderge 1,5 jasqa deıingi dekrettik tólem beriledi. Onyń muqtaj nemese aýqatty ekeni mańyzdy emes.
— Siz jumys istep júrdińiz, aı saıyn barlyq jarnany tólep turdyńyz. Memlekettik áleýmettik saqtandyrý qory sizdiń buǵan deıin alǵan jalaqyńyzdyń 40 paıyzyn balańyz bir jarym jasqa tolǵanǵa deıin tóleı beredi. 1 qańtardan keıin de dúnıege bala ákelgen A kategorııasynda jáne V kategorııasyndaǵy áıelder de dekrettik tólemdi ala beredi, — dedi Lázzat Qojahmet.
Bul rette 1 qańtardan bastap, jumys istemeı, úı sharýasynda otyryp, balany dúnıege ákelgen áıelderdiń muqtajdyq deńgeıi qaralady.
— Eger onyń otbasy muqtaj bolsa ǵana bul tólemdi alady. Eger muqtaj bolmasa, ıaǵnı áıel adam jumysqa jaramdy bolyp tursa, densaýlyǵynda kinárat bolmasa, ıaǵnı onyń ómir súrýine jetkilikti otbasynda tabysy bar degen sóz. Osy otbasyna A jáne B kategorııasyna kiretin áıelder bul tólemdi ala almaıdy, — dedi depýtat.
Qazirgi ýaqytta Qazaqstanda osy dekrettik tólemderdi alyp otyrǵan A jáne B sanatyna kiretin 11 myń áıel bar.
— Jyl saıyn 200 myń, 300 myń bala dúnıege kelse, sonyń ishinde 11 myń áıel A jáne B sanatyna jatady. Sondyqtan jumys istep júrgen áıelder esh qaýiptenbese de bolady. Alańdamańyzdar. Ózińizdiń densaýlyǵyńyzǵa jáne ómir súrýińizge jetkilikti tabys taýyp, sodan keıin balańyzdy dúnıege ákeletin bolsańyz, sizge memleket jan-jaqty qoldaý kórsetedi. Sońǵy eki jyldaǵy tabysyńyzdyń 40 paıyzyn dekrettik tólem retinde bala 1,5 jasqa tolǵansha ala alasyz, — dep túsindirdi Quryltaı depýtaty.
Eske sala ketsek, Qazaqstanda 2027 jylǵy 1 qańtardan bastap ataýly áleýmettik qoldaýdyń jańa júıesi tolyq kólemde iske qosylady.
Sondaı-aq otbasynyń muqtajdyǵyn baǵalaý kezinde tabys qana emes, shyǵystar da eskeriletin bolady.
