Jumys isteı almasańyzdar, mınıstrmen qosa qýyp shyǵamyz – Baqytjan Bazarbek
Májilis spıkeri otyrys barysynda depýtat Baqytjan Bazarbekke eskertý jasady, dep habarlaıdy Kazinform.
«Jalyndy sálemimdi Tamara Dúısenqyzyna joldaımyn. Bir-eki jyl buryn Prezıdenttiń kómekshisi bolyp turǵan kezińizde sizben vıdeokonferentsııaǵa shyqqanbyz. Sonda SQO Bostandyq degen aýyl bar. Aýyl turǵyndary jaıylymdyq jerlerinen aıyrylyp qalǵan. Siz jeke maǵan jáne aýyl turǵyndaryna ýádeni tógip-tógip bergensiz. Mine, endi áp-ádemi, túk bilmegendeı mınıstrdiń qyzmetine otyrdyńyz. Sondyqtan myna jerde osy múmkindikti paıdalanyp sizge aýyl turǵyndarynyń jalyndy sálemin jetkizip otyrmyn», — dedi Májilis depýtaty Baqytjan Bazarbek jalpy otyrysta.
Sondaı-aq, halyq qalaýlysy Aýyl sharýashylyǵy mınıstrligine saýal joldady.
«Eger jumys isteı almasańyzdar, mınıstrmen qosa mınıstrlikten qýyp shyǵamyz», — dedi ol Aýyl sharýashylyǵy vıtse-mınıstri Ábilhaıyr Tamabekke qaratyp.
Óz kezeginde Májilis spıkeri Erlan Qoshanov depýtatqa reglamentti buzbaýyn surap, eskertý jasady.
«Qurmetti Baqytjan Jumabekuly! Birinshi kezekte depýtattyq etıka degen bar. Siz qatty ketpeńiz! Agressııasyz sóıleńiz. Ekinshiden, men jaqtap otyrǵanym joq. Qoıyp otyrǵan suraǵyńyz durys. 10 mln gektarǵa jýyq jer qaıtaryldy. Bul — birinshi kezekte „Jer amanaty“ komıssııasynyń jumysy. Endi ony ári qaraı bólý kezinde ádil bólinip jatyr ma, joq pa — sol ǵoı sizdiń suraǵyńyz. Ol — eń aldymen jergilikti ákimderdiń, ekinshi kezekte osy quzyretti organdardyń máselesi, solardyń jaýapkershiligi. Ekinshiden, „Jer amanaty“ komıssııasynyń quramyna Bas prokýratýra da, Aýyl sharýashylyǵy mınıstrliginiń basshylyǵy, jer resýrstary komıtetiniń basshysy, depýtattar, sonymen qatar qoǵamdyq belsendiler, qoǵam ókilderi de kiredi. Onyń basshysynyń biri ózińiz. Sondyqtan men de sizge jalyndy sálem aıtqym keledi. „Jer amanaty“ komıssııasy da osy máselege qatysty ar jaǵynda qalaı ádil bólinip jatyr, sony qadaǵalaýǵa, baqylaýǵa búkil quzireti bar. Bul máseleni jergilikti bılik ókilderi de, mınıstrlik te qaraýy kerek. Komıssııa da jaýapty. Biraq suraq qoıǵanda, Baqytjan Jumabekuly, bul birinshi ret emes, sizge suraq qoıǵanda reglamentti qamtamasyz etetin palatanyń basshysy retinde eskertý jasaımyn», — dedi ol.
