Jumys istep júrgen zeınetkerlerge zeınetaqy tólenbeýi múmkin be – mınıstr jaýaby
ASTANA. KAZINFORM – Zeınetke shyǵyp, biraq jumys istep júrgen azamattarǵa zeınetaqy toqtatylýy múmkin be? Bul saýalǵa Eńbek jáne halyqty áleýmettik qorǵaý mınıstri Svetlana Jaqypova jaýap berdi.
«Ótken jumada Eńbek resýrstaryn damytý ortalyǵynda BAQ ókilderimen beıresmı kezdesý ótkizdim. Bul saýal sol kezdesýde qoıyldy, biraq meniń jaýabymnan konteksti julyp alǵan. Men zeınetke shyǵýdyń 2 tásili baryn ıaǵnı erte jáne kesh shyǵý jáne bul ázirge usynys ekenin aıttym. Bul usynys qazir zeınetaqy alyp otyrǵan azamattarǵa eshqandaı kedergi keltirmeıdi. Olar qalaı zeınetaqysyn aldy, qalaı jumys istep otyr, solaı ári qaraı jalǵasa beredi», - dedi Svetlana Jaqypova Úkimet otyrysynan keıin ótken baspasóz máslıhatynda.
Mınıstrdiń aıtýynsha, bul usynys Úkimettiń qaraýyna áli engizilmegen.
«Qazir boljam jasap, eńbek naryǵyn qarastyryp otyrmyz. Bıyl eńbek naryǵyna 300 myń jas keldi. Olarǵa jumys oryndary da kerek. Sondyqtan sarapshylar osyndaı usynys berip otyr»,-dedi mınıstr.
Aıta ketsek, birer kún buryn Svetlana Jaqypova BAQ ókilderimen beıresmı kezdesý barysynda qazaqstandyqtardyń zeınetkerlikke erte shyǵý múmkindigi jaıly aıtqan edi.
Onyń aıtýynsha, zeınetke erte shyqqysy keletin azamattardyń eńbek ótili 25 jyldan kem bolmaýy kerek. Sonymen qatar 25 jyl boıy zeınetaqy qoryna aýdarymdary bolýy tıis. Sol kezde ol azamattar zeınet jasyn kútpeı erterek zeınetke shyǵa alady.
