Jumys saldarynan 1000-nan asa japon psıhıkalyq dertke shaldyqqan

ASTANA. KAZINFORM — Japonııada 2024 jyly jumysqa qatysty psıhıkalyq dertter sany 172-ge artyp, 1 055-ke jetti — bul qatarynan altynshy jyl rekordtyq kórsetkish, dep habarlaıdy Kyodo News.

Japonııanyń Densaýlyq saqtaý, eńbek jáne ál-aýqat mınıstrliginiń málimetinshe, tirkelgen jalpy jaǵdaılardyń ishinde 88-i sýıtsıd nemese sýıtsıdke áreket jasaý jaǵdaılary bolǵan. Bul ótken jylmen salystyrǵanda 9 jaǵdaıǵa kóp.

Olardyń ishinde 224 jaǵdaıǵa basshylyq tarapynan qysym kórsetý men mazasyn alý sebep bolǵan. Al ekinshi orynda — jumystyń kólemi nemese sıpatynyń kúrt ózgerýi tur(119 jaǵdaı).

Klıentterdiń dóreki qarym-qatynasy men agressııasy (aýyzsha jáne fızıkalyq) psıhıkalyq dertterge sebep bolatyn úshinshi faktorǵa aınaldy. Mundaı 108 jaǵdaı tirkelgen, onyń 78-i áıelderge qatysty bolǵan.

Kyodo News dereginshe, klıentterden kórgen psıhologııalyq qysym 2023 jyldan bastap ótemaqy tóleýge negiz bolatyn sebepterdiń qataryna engen.

Salalar boıynsha eń kóp ótemaqy talaptary áleýmettik qamsyzdandyrý jáne kómek kórsetý salasynyń qyzmetkerleri tarapynan kelip túsken — barlyǵy 270 jaǵdaı.

Jalpy alǵanda, psıhıkalyq aýrýlarǵa baılanysty ótemaqy tóleý týraly ótinishter sany 3 780-ge jetken. Bul ótken jylmen salystyrǵanda 205-ke kóp bolyp otyr — bul da rekordtyq kórsetkish.

Buǵan deıin habarlanǵandaı, Japonııada bala týý deńgeıi alǵash ret tómendedi.