Jumys ótilinen jaltarý: «Bolashaq» túlekteri qandaı qýlyqtarǵa barady

ASTANA. KAZINFORM — «Bolashaq» túlekteri elge kelgen soń 5 jyldyq jumys ótilin óteý kezinde túrli qýlyq-sumdyqtarǵa baratyny anyqtaldy. Bul týraly QR Ǵylym jáne joǵary bilim mınıstri Saıasat Nurbek aıtty.

Brıfıngte BAQ ókili qaryzyn ótemegen «Bolashaq» túlekteri jaıly suraq qoıdy. 

— Ókinishke qaraı, ondaı túlekterimiz bar. Byltyr úlken aýdıt júrgizdik. Kim shetelde qalyp qaldy? Qazirgi tańda «Bolashaq» baǵdarlamasynyń bazasy shekara qyzmetiniń bazasymen ushtastyryldy. Kim qaıda shyqty? Kim shekaradan ótti? Bizge bul málimetter jetip otyrady. Ondaı 200-300 shamasyndaǵy adam aıqyndaldy. Ondaı adamdar birden stıpendııadan aıyrylady. Ne sottyń sheshimimen, ne ekijaqty kelisimmen ol aqsha qaıtarylady, — dedi ol.

Mınıstr «Bolashaq» túlekteriniń elge kelgen soń 5 jyldyq jumys ótilinen ótý kezinde baratyn birqatar qýlyq áreketterin de áshkere etti.

— Qazaqstanda bir kompanııaǵa tirkeledi. Sosyn sol kompanııanyń esepterin jiberip turady. Ony biz qazir salyq organdarymen qarastyryp, birden aıqyndaımyz. Mınımaldy salyq tólep turǵanda birden belgili bolady. Odan bólek, aýyldy jerlerge shyǵyp ketedi. Sebebi aýyldy jerge barǵanda onyń jumys ótili 5 jyldan 3 jylǵa qysqarady. Sonda bir kompanııaǵa tirkeledi de, ózi qalada jumys istep júredi. Ony da anyqtaýdyń jolyn taýyp aldyq, — dedi Saıasat Nurbek.

Spıker qazir halyqaralyq baǵdarlamamen bilim alǵan túlekterdi qadaǵalaý tetikteri kúsheıtilgenin qadap aıtty. 

Buǵan deıin «Bolashaq» arqyly daryndy oqýshylardyń bakalavrıatqa qalaı túse alatyny jaıly jazǵan edik.