Jumys ornynda harassmentten qorǵaý: jańa norma kelisýden ótip jatyr
ASTANA. KAZINFORM – QR Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev jumystaǵy harassment úshin jaýapkershilik engizý jónindegi jańa normaǵa qatysty túsinik berdi.
- Jumys ornynda harassmentten qorǵaý tetikterin ázirleý jospar boıynsha júzege asyrylyp keledi. Adam quqyǵy jónindegi bul jospar elde joǵary deńgeıde bekitilgen. Sonymen qatar osyndaı normany engizý jóninde halyqaralyq eńbek uıymynyń da usynysy bar, - dedi E.Tuıaqbaev Senattyń jalpy otyrysynan keıin tilshiler suraǵyna jaýap bere otyryp.
Osy oraıda ol tıisti zań jobasy eldegi memlekettik organdarda kelisýden ótip jatqanyn atap ótti.
- Harassmentten qorǵaý máselesi boıynsha normany engizý kún tártibinen túsken emes. Bul jumysty jalǵastyryp, ony zańnamalyq deńgeıde bekitemiz... Harassmentke jol bermeý tetikteri biraz elde aıqyndalǵan. Sondyqtan halyqaralyq úzdik tájirıbeni alyp, jaýapkershilikke tartýdyń dárejesin memlekettik organdarmen pysyqtaımyz, - dedi vıtse-mınıstr.
Eske salsaq, 2024 jyly harassmenttiń aldyn alatyn zań jobasy ázirlenip jatqany habarlanǵan edi.
Aıta keteıik, birneshe jyl buryn senator elimizdegi áıelderdi jumys ornynda harassmentten qorǵaýdy talap etken bolatyn.
