Jumys ornyn jelide jarııalaý tsıfrlyq qaýip tóndiredi — maman pikiri

ASTANA. KAZINFORM — Alaıaqtarǵa azamattardyń atynan nesıe rásimdeýge ruqsatty olardyń ózderi beredi. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstrliginiń mamany aıtty.

— Alaıaqtar tek sizdiń derbes derekterińizdi bilgenimen, sizdiń atyńyzdan nesıe rásimdeı almaıdy. Bul úshin adamnyń ózi SMS-kod nemese ózge de rastaý ádisteri arqyly ruqsat berýi kerek. Eger mundaı rastaý bolmasa, nesıe rásimdeý múmkin emes, — deıdi Tsıfrlyq damý, ınnovatsııalar jáne aeroǵarysh ónerkásibi mınıstrligi Aqparattyq qaýipsizdik komıteti tóraǵa orynbasary Úmitjan Aryqbekova Jibek Joly telearnasynyń «Búgin LIVE» baǵdarlamasyna bergen suhbatynda.

Mamannyń pikirinshe, adamnyń jumys ornyn ashyq jarııalaý tsıfrlyq qaýipsizdikke qater tóndiredi.

— Azamattardyń jumys orny da jeke derekterge jatady. Eger adam óz jumys ornyn bilmestikpen ınternetke jarııalap qoısa, alaıaqtar sol mekemege habarlasyp, ol týraly aqparat alýǵa tyrysýy múmkin. Mysaly, mekemege qońyraý shalyp, «osyndaı adammen baılanystyryp jiberińiz» nemese «maǵan habarlassyn» dep sendirý arqyly túrli alaıaqtyq áreketterge barady. Osylaısha, azamattardyń aqshasyn zańsyz túrde ıemdenedi, — deıdi ol.

Aqparattyq qaýipsizdik komıteti osyndaı máselelerdiń aldyn alý úshin «Stop kredıt» qyzmetin iske qosqan.

— Bul baǵytta Aqparattyq qaýipsizdik komıteti qarqyndy jumys júrgizip jatyr. Alaıaqtardan saqtaný úshin eGov qosymshasyna «Stop kredıt» qyzmeti engizildi. Bul qyzmetti kez kelgen azamat paıdalana alady, — deıdi stýdııa qonaǵy.

Úmitjan Aryqbekova fıshıngtik saıttardan saqtaný jolyn da túsindirdi.

— Biz jıi «fıshıngtik saıt» týraly aıtyp jatamyz, biraq kópshilik bul uǵymdy jete túsine bermeıdi. Eger sizge qandaı da bir kompanııanyń siltemesin jiberip, «osy siltemege kirińiz» dep habarlasqan adam bolsa, oǵan birden kirmeńiz. Bizde Nomad Guard atty júıe bar. Sol júıege kirip, jiberilgen siltemeni engizý arqyly onyń zańdy saıt álde fıshıngtik silteme ekenin tekserýge bolady, — deıdi Aqparattyq qaýipsizdik komıteti tóraǵasynyń orynbasary.

Mınıstrlik mamany elimizdegi túrli zańdy uıymdarǵa messendjer arqyly qońyraý shalýǵa tyıym salynǵanyn da jetkizdi.

— Qazirgi tańda Aqparattyq qaýipsizdik komıteti qandaı da bir uıymdarǵa WhatsApp, Telegram sııaqty messendjerler arqyly azamattarǵa qońyraý shalýǵa tyıym saldy. Endi kez kelgen uıym tek tirkelgen qalalyq nómir arqyly ǵana habarlasýy tıis. Sol sebepti, eger sizge bireý mobıldi nómirmen habarlasyp, qandaı da bir máseleni baıandap jatsa, mindetti túrde onyń jumys nómirin surańyz. Sebebi alaıaqtardyń kópshiliginde resmı jumys nómiri bolmaıdy, — deıdi ol.

Eske sala keteıik, buǵan deıin mınıstrlik mamany Tsıfrlyq kodeks qaı ýaqytta betiletini týraly pikir bildirgen edi.