Jumys kúshi tapshylyǵyna baılanysty Grekııanyń JІÓ ósimi toqyrady

ASTANA. KAZINFORM — Grekııa jyl saıyn jumys kúshi jetispeýinen shamamen 6–8 mıllıard eýro kóleminde jalpy ishki ónimin (JІÓ) joǵaltyp otyr, dep habarlaıdy AZERTADJ.

Agenttik News247 portalyna silteme jasap habarlaýynsha, Grekııadaǵy jumys kúshi tapshylyǵy — el ekonomıkasynyń damýyna, básekege qabilettiligine jáne negizgi salalardyń turaqtylyǵyna eleýli áser etetin qurylymdyq másele. Bul problema ekonomıkanyń barlyq salasyn jáne túrli mamandyqtardy qamtıdy.

Sarapshylardyń baǵalaýynsha, eńbek naryǵynda shamamen 300 myń jumysshy jetispeıdi. Bul ınvestıtsııalardyń júzege asýyna, kásiporyndardyń qarjylyq kórsetkishterin jaqsartýǵa kedergi keltirip, ekonomıkany jalpy turǵyda álsiz etedi.

Qazirgi tańda kadr tapshylyǵy tek maýsymdyq nemese biliktiligi tómen jumystarmen shektelmeı, tehnıkalyq bilimdi, tájirıbeni jáne beıimdelý qabiletin talap etetin salalarǵa da áser etip otyr. Ásirese ónerkásip, qurylys, týrızm jáne aqparattyq tehnologııalar salalarynda jumysshylarǵa suranys kúrt artqan.

Sońǵy jyldary ótken barlyq ekonomıkalyq forýmdar men talqylaýlarda bul másele mindetti túrde kóterilip keledi, ári ol ýaqytsha qıyndyq emes ekeni anyq baıqalyp otyr.

WorkInGreece.io tsıfrlyq platformasynyń zertteýine sáıkes, Grekııa jumys kúshi tapshylyǵyna baılanysty jyl saıyn shamamen 6–8 mıllıard eýro kóleminde JІÓ-den aıyrylady. Bul jaǵdaı eńbek naryǵynda júıeli sheshimderdiń, sonyń ishinde úshinshi elderden bilikti mamandardy tartýdyń asa qajetti ekenin aıqyn kórsetedi.

Buǵan deıin Grekııalyq temirjolshylar saladaǵy ózekti máselelerdi sheshýdi talap etip, el boıynsha 24 saǵattyq ereýilge shyqqanyn jazǵanbyz.

Degenmen Grekııa parlamenti qarsylyq tanytý jáne jalpyulttyq ereýilderge qaramastan 13 saǵattyq jumys kúnin engizýge múmkindik beretin eńbek týraly daýly zań jobasyn maquldady.