Jumys kúni 8:00–17:30 aralyǵynda: Eńbek mınıstrligi jańa jumys kestesiniń nátıjesin aıtty

ASTANA. KAZINFORM — Eńbek jáne halyqty áleýmettik qorǵaý mınıstrligi 8:00–den 17:30–ǵa deıingi jańa jumys kestesine kóshýdi oń baǵalap otyr. Bul týraly Eńbek memlekettik ınspektsııasy komıtetiniń tóraǵasy Erbolat Ábilhatın málimdedi.

Spıkerdiń aıtýynsha, jumys ýaqytyn osylaı uıymdastyrý tańerteńgi keptelisten qutqarady jáne qyzmetkerlerdiń jeke ýaqytyn tıimdi paıdalanýǵa múmkindik beredi.

— Tańerteń jumysqa keptelissiz jetemiz, 7:30–da jumysyńa shyǵyp ketseń, kósheler bos. 17:30–da jumysyń aıaqtalady, áli jaryq kezde jaqyndaryńa kóńil bólýge nemese óz isińmen aınalysýǵa bolady. Basqa memlekettik organdarmen ózara is-qımylǵa kelsek, Astana ákimdigi de ıkemdi kestege kóship jatyr, — dedi Erbolat Ábilhatın Úkimettegi brıfınte.

Sonymen birge, Erbolat Ábilhatın Eńbek memlekettik ınspektsııasy komıteti qyzmetkerleri tarapynan jańa kestege eshqandaı shaǵym túspegenin atap ótti.

Buǵan deıin Májilis depýtaty Asylbek Nuralın Astanada jumys kúni bastalatyn ýaqytty saǵat 9:00-den 7:00-ge aýystyrýdy usynǵan edi.