Jumys berýshiler óz qarajaty esebinen mindetti zeınetaqy jarnasyn aýdara bastaıdy
Búginnen bastap «Jumys berýshiniń mindetti zeınetaqy jarnalaryn esepteý (esepke jazý) jáne biryńǵaı jınaqtaýshy zeınetaqy qoryna aýdarý jáne olar boıynsha óndirip alý qaǵıdalary men merzimderin bekitý týraly» el Úkimetiniń qaýlysy kúshine endi, dep habarlaıdy Kazinform.
Atalǵan qujatqa sáıkes, 2024 jylǵy 1 qańtardan bastap jumys berýshiler óz qarajaty esebinen mindetti zeınetaqy jarnasyn aýdara bastaıdy. Ol 2024-2028 jyldar aralyǵynda 1,5%-dan 5%-ǵa deıin kezeń-kezeńimen ósýge tıis. Osylaısha zeınetke shyqqan kezde bul jumyskerler qosymsha jınaqtaýshy zeınetaqy tólemimen qamtamasyz etiledi.
Bul shara ásirese jas qazaqstandyqtardy qoldaýǵa baǵyttalǵan. Olardyń zeınetaqysy aýdarymyna tikeleı baılanysty bolady. Olardyń zeınetaqysy úsh komponentten: memleketten bazalyq zeınetaqy, jınaqtaýshy zeınetaqy — Biryńǵaı jınaqtaýshy zeınetaqy qoryna aýdarym esebinen jáne shartty-jınaqtaýshy zeınetaqy jumys berýshilerdiń jarnasy esebinen quralady.
Jumys berýshiniń mindetti zeınetaqy jarnalaryn engizý, ásirese, yntymaqty ótili joq (1998 jylǵa deıin) nemese yntymaqty júıedegi ótili az azamattar úshin ózekti.
Osylaısha álemdik tájirıbeni eskere otyryp, azamattardy zeınetaqymen qamsyzdandyrý úshin memlekettiń, jumys berýshiniń jáne qyzmetkerdiń ortaq jaýapkershiligi bolady.
Salyq kodeksine sáıkes salyq salynatyn tabystan shegerimge jatqyzylǵandyqtan, tıisinshe jumys berýshiniń Jumys berýshiniń mindetti zeınetaqy jarnalaryn tóleý shyǵyny eleýsiz deńgeıde qalatynyn atap ótý qajet.
