Jumys berýshi Eńbek sharttaryn esepke alý júıesine qandaı málimet engizýge mindetti
ASTANA. KAZINFORM — Qazaqstanda jumys berýshiler eńbek shartyn jasasý, oǵan ózgerister engizý jáne toqtatý týraly málimetti Eńbek sharttaryn esepke alýdyń biryńǵaı júıesine (EShEBJ) zańnamada belgilengen merzimde engizýge mindetti.
Bul týraly QR Eńbek jáne halyqty áleýmettik qorǵaý mınıstrligi Memlekettik eńbek ınspektsııasy komıtetiniń Astana qalasy boıynsha departamenti basshysynyń orynbasary Murat Shákenov Óńirlik kommýnıkatsııalar qyzmetinde ótken baspasóz máslıhatynda málim etti.
Onyń aıtýynsha, eńbek sharty týraly málimet taraptar qujatqa qol qoıǵan kúnnen bastap bes jumys kúni ishinde EShEBJ-ge engizilýi tıis.
— Eńbek shartyna ózgerister nemese tolyqtyrýlar engizilgen jaǵdaıda bul týraly málimet 15 kúntizbelik kún ishinde jańartylýy qajet. Al eńbek qatynastary toqtatylsa, aqparat úsh jumys kúninen keshiktirilmeı júıege engizilýge tıis, — dedi Murat Shákenov.
Jumys berýshi EShEBJ-ge eńbek sharty týraly málimetpen birge qyzmetkerdiń jeke derekterin, laýazymyn nemese kásibin, jumys ornyn, eńbek shartynyń qoldanylý merzimin, jumysqa kirisken kúnin, sondaı-aq eńbek shartynyń jasalǵan kúni men nómirin engizýge mindetti.
Sonymen qatar júıede qyzmetkerge júktilikke jáne bosanýǵa, sondaı-aq jańa týǵan balany asyrap alýǵa baılanysty berilgen demalys týraly málimet te kórsetilýi tıis. Aqparatty EShEBJ-ge engizý tártibi Eńbek jáne halyqty áleýmettik qorǵaý mınıstriniń buıryǵymen bekitilgen qaǵıdalarǵa sáıkes júzege asyrylady.
Eske salaıyq, buǵan deıin eńbek kitapshasynda qate ketken nemese qajetti jazbalar bolmaǵan jaǵdaıda eńbek ótilin muraǵat anyqtamasy, ózge de rastaıtyn qujattar nemese sot arqyly dáleldeýge bolatynyn jazǵan edik.
