Jumys berýshi qyzmetkerdiń jaraqaty jóninde tsıfrlyq júıege habarlaýǵa mindetti
ASTANA. KAZINFORM – QR Eńbek jáne halyqty áleýmettik qorǵaý mınıstrligi jumysshylardy óndiristegi jazataıym oqıǵalardan mindetti saqtandyrý shartyn bekitý týraly málimetti joldaý qaǵıdalaryna ózgerister engizdi.
Qujat boıynsha bekitilgen mindetti saqtandyrý sharttary týraly derekterdi jumys berýshiler eńbek jónindegi ýákiletti memlekettik organǵa avtomattandyrylǵan formatta – málimetterdi derekter bazasynan «Eńbekti qorǵaý jáne qaýipsizdik» tsıfrlyq júıesine joldaý arqyly jiberedi.
Bul júıe memlekettik eńbek ınspektorlarynyń tekserý nátıjelerin esepke alýdy, sondaı-aq óndiristegi jazataıym oqıǵalardy tergeýdi avtomattandyrýǵa arnalǵan.
Sondaı-aq jumys berýshiler jazataıym oqıǵa týraly aktini «Elektrondyq eńbek bırjasy» tsıfrlyq portaly arqyly jiberedi. Ol úshin elektrondyq tsıfrlyq qoltańbany paıdalaný arqyly jeke kabınetti tirkeý qajet.
Jeke kabınette jumys berýshi aktini elektrondy túrde (skanerlengen kóshirme) ornalastyrady, elektrondy tsıfrlyq qoltańbamen bekitedi jáne eńbekti qorǵaý júıesine joldaıdy.
Jazataıym oqıǵalardy tirkeýdi jáne esepke alýdy jumys berýshiniń memlekettik tirkelgen jeri boıynsha aýmaqtyq bólimsheler júzege asyrady. Málimetter júıege akti túsken sátten bastap eki jumys kúninen keshiktirilmeı engiziledi.
Atap aıtqanda, jumyspen baılanysty barlyq jazataıym oqıǵalar esepke alynady.
Bul buıryq 2026 jylǵy 12 shildeden kúshine enedi.
Budan buryn habarlanǵandaı, Pavlodar óńirinde sońǵy úsh jylda óndiristegi jazataıym oqıǵalardan 20 adam kóz jumǵan.
