Jumys barysynda tabandylyqpen qatar shynaıy janashyrlyq qajet - áleýmettik qyzmetker

AQTAÝ. KAZINFORM – Áleýmettik qyzmetker – qoǵam janashyry. Ol ómirlik qıyn jaǵdaıǵa tap bolǵan jandarǵa qoldaý kórsetýdiń tetikterin úılestirýshi. Osy salada 10 jyldan asa ýaqyt eńbek etip júrgen Dınara Aqberdiqyzynyń aıtýynsha, bul jumys syrt kózge jeńil kóringenimen, shyn máninde, úlken tózim men tabandylyqty qajet etedi.

Dınara Aqberdiqyzy – Aqtaý qalalyq №3 arnaýly áleýmettik qyzmetter kórsetý ortalyǵynda meıirim men kásibı biliktilikti tereń meńgergen mamandardyń biri. Ol áleýmettiń áljýaz tobyna arnaýly áleýmettik qyzmet kórsetý sharalaryn uıymdastyryp, erekshe balalardyń ata-analary men qamqorshylarymen jumys isteıdi.

- Áleýmettik qyzmet kórsetý, halyqpen tikeleı jumys isteý – bul ádistemelik bilim men daǵdylardy talap etetin eńbek. Adamdar qıyn ómirlik jaǵdaıda bizderge júginedi. Sondyqtan áleýmettik qyzmetkerlerdiń minez-qulqy qoǵamnyń senimin nyǵaıtýy kerek. Sapasyz qyzmet kórsetý men janjaldy jaǵdaılardyń aldyn alý úshin kásibı etıkany saqtaımyz. Ásirese, árbir balanyń jeke ereksheligin eskerip, oǵan jeke baǵdarlama jasaý qajet. Jumys barysynda tabandylyq, tózimdilik pen kásibılik qana emes, sonymen qatar úlken júrek pen shynaıy janashyrlyq qajet, – deıdi áleýmettik jumys jónindegi maman Dınara Aqberdiqyzy.

Dınara Aqberdiqyzy qoǵam ıgiligine adal qyzmet etip, óńirde áleýmettik salany damytýǵa aıtarlyqtaı úles qosyp júrgen bilikti maman. Adal qyzmeti úshin, ata-analardyń alǵysyna bólengen.

- Bizdiń jumys syrt kózge jeńil kóringenimen, shyn máninde, úlken tózimdilik pen tabandylyqty qajet etedi. Áleýmettik ádildik pen gýmanızm qaǵıdatyna ıek artyp, arnaıy kásibı etıka men moraldyq turaqtylyqty, emotsıonaldyq teńgerimdi jete meńgergen kadrlar bul salanyń negizin quraıdy. Ásirese psıhonevrologııalyq aýytqýy bar balalardy áleýmettik beıimdeý, qoǵamǵa kiriktirý, ómir súrý sapasyn jaqsartý bilikti mamannyń baǵyttaýymen júzege asady. Densaýlyǵynda aqaýy bar balalalarmen jasóspirimderdiń qabyldaý, túısiný, bilim, bilik daǵdylaryn ishteı tutastyryp, olardy erkin qoldanýǵa úıretý – biz sııaqty mamandardyń kásibı daıyndyǵyna tikeleı baılanysty, - deıdi ol. 

Keıde qarapaıym adamı qarym-qatynastyń ózi - qamkóńil jandardyń kóńiline demeý bolady. Áleýmettik qyzmetker muhtaj jandy kez-kelgen jaǵdaıda qoldaýǵa ázir turady. 

- Áleýmettik qyzmetkerler turǵyndardyń quqyn qorǵaýǵa, járdemaqyny rásimdeýge, ýaqytsha baspana izdeýge, azyq-túlik pen kıim-keshek jetkizýge kómektesedi. Olar sondaı-aq, kúızeliste júrgen adamdarǵa keńes berip, emotsıonaldyq alańdaýshylyqtardy eńserýge, psıhologııalyq densaýlyqty qalpyna keltirýge qoldaý kórsetedi. Azamattardyń jumysqa ornalasýyna, jańa daǵdylardy úırenýge, qoǵamǵa beıimdelýine uıytqy bolamyz, - deıdi maman.

Aqtaý qalalyq №3 arnaýly áleýmettik qyzmetter kórsetý ortalyǵynda 4 jastan 18 jasqa deıingi psıhonevrologııalyq aýytqýshylyǵy bar balalarǵa túrli baǵytta qyzmet kórsetiledi. 

- Men óz jumysymnyń mańyzyn túsinemin. Áleýmettik qyzmetker aqyl-oı damýynda tejelisi bar balalarmen qarym-qatynasta tek maman retinde ǵana emes, sondaı-aq qamqorshy, tárbıeshi, psıholog, dos retinde qyzmet atqarady. Biz buny qyzmettik mindet dep emes, adamgershilik paryz dep esepteımiz, - deıdi Dınara Aqberdiqyzy.

Dınara Aqberdiqyzy tek balalar emes, jalǵyzilikti qarııalar men erekshe muqtajdyǵy bar jandarǵa da qoldaý kórsetilip, júıeli jumystar júrgizilip jatqanyn aıtady. Osy tusta, qoǵam da osy jandarǵa meıirimdilik tanytsa ıgi. 

- Bul negizinde qoǵamǵa ortaq paryz ǵoı. Dese de, jan jylýyna muqtaj jandarǵa ár kez meıirbandyq tanytatyn mártebeli mamandyq ıeleri – áleýmettik qyzmetkerlerdiń bul iste úlesi basym ekeni sózsiz. Olar – izgilikke, jaqsylyqqa jany qumar, ózgeniń qaıǵysyna ortaqtasyp, qınalǵan adam kórse, qol ushyn sozyp, kóp saralap jatpaı, kómegin esh aıamaıtyn jandar. Áleýmettik qyzmetkerlerdiń osy salada turaqtap qalýy da osy qasıetterinde. Sebebi, qyzmet alýshynyń babyn tabý maqsatynda qaltqysyz qyzmet etý dene kúshimen birge psıhologııalyq tabandylyqty asa qajet etedi. Bul úlken júrekti, izgi adamgershilik qasıetter boıyna uıalaǵan, ózinen góri ózgelerge bolsyn deıtin adamnyń ǵana qolynan keletin is. Qyzmette bolsyn, jeke ómirde, jalpy aınalamyzda osyndaı meıirimdi adamdardyń kóp bolǵany qandaı ǵanıbet, - deıdi áleýmettik jumys jónindegi maman Dınara Aqberdiqyzy.

Buǵan deıin, Elimizdiń úzdik áleýmettik qyzmetkerleri arasynda baıqaý jarııalanǵan bolatyn.