Elimizde jumyrtqa óndirisiniń artýy baǵaǵa qalaı áser etedi
ASTANA. KAZINFORM — Qazaqstan taýyq jumyrtqasymen ózin-ózi qamtamasyz etedi. Biraq ónimge degen suranys jyl mezgili men aımaqqa baılanysty ózgerip otyrady. Qus fabrıkasynyń dırektory Erhat Tájenov Jibek Joly telearnasynyń «Búgin.LIVE» baǵdarlamasynda qysta suranystyń nelikten artatyny jáne óndiristiń artýy baǵaǵa qalaı áser etetini týraly aıtty.
Tájenovtiń aıtýynsha, jumyrtqa naryǵy kóbinese maýsymdyq aýytqýlarǵa táýeldi. Tutyný kólemi jazda azaıady, al qysta artady. Bul jaǵdaı aımaqqa baılanysty ózgerýi múmkin.
– Jalpy alǵanda, Qazaqstanda otandyq jumyrtqa jetkilikti. Ótken jyly 4,5 mıllıard jumyrtqa óndirdik. Bul – eldegi barlyq qus fabrıkalarynyń ónimi. 100% jetkilikti túrde qamtamasyz etildi. Degenmen qysta suranys kúrt artyp, jazda tómendeıtin kezder bolady, - dep túsindirdi ol.
Kompanııa dırektory óndiris kólemi aımaqtar boıynsha birkelki emes ekenin atap ótti. Ol mysal retinde Aqmola oblysyn keltirdi. Onda bes qus fabrıkasy jumys isteıdi, olar jumyrtqanyń aıtarlyqtaı kólemin óndiredi.
Tájenov baǵa máselesine de toqtaldy. Onyń pikirinshe, óndiris kóleminiń artýy básekelestikti kúsheıtedi jáne jumyrtqa baǵasyna oń áser etýi múmkin. Degenmen kóp nárse kásiporyndardyń shyǵynyna baılanysty.
– Óndiristiń artýy, eń aldymen, básekelestikti týdyrady. Bul árqashan sapaǵa oń áser etedi. Tıisinshe, baǵa tómendeýi de múmkin. Biraq shyǵyndarymyzdyń negizgi bóligi astyq, ıaǵnı jem ekenin este ustaýymyz kerek. Munyń bári astyq naryǵynda belgilengen baǵaǵa, sondaı-aq ınfraqurylymǵa, elektr energııasyna jáne otyn shyǵyndaryna baılanysty bolady, - dep atap ótti spıker.
Aıta keteıik, Reseıden ákelingen 605 myń taýyq jumyrtqasy keri qaıtaryldy.