Jumeken Nájimedenov atyndaǵy kórkemsóz baıqaýynyń jeńimpazdary anyqtaldy
Qurmanǵazy atyndaǵy mádenıet saraıynda ánuran avtory, memlekettik syılyqtyń laýreaty, qazaqtyń kórnekti aqyny Jumeken Nájimedenov atyndaǵy «Elim meniń!» kórkemsóz oqý sheberleriniń respýblıkalyq baıqaýy ótti.
Oǵan elimizdiń ár óńirinen 18-35 jas aralyǵyndaǵy 13 úmitker qatysty.
«Jumeken Nájimedenov osy óńirdegi Qoshalaq topyraǵynda dúnıege kelgen. Óziniń jalyndy jastyq shaǵyn Alataýdyń baýraıynda ótkizgen aqyn týǵan jerge degen saǵynyshyn árkez jyryna arqaý etti. Onyń jyrlarynan taǵylym men tárbıeniń, adaldyq pen otansúıgishtiktiń tereń mánin ańarýǵa bolady. Jumeken shyǵarmalaryn tereń zerttep, keıingi urpaqqa nasıhattaý – bizdiń boryshymyz, -dedi oblys ákiminiń orynbasary Jasulan Bısembıev.
Baıqaýǵa qatysýshylar Jumeken Nájimedenovtiń poezııalyq jáne prozalyq shyǵarmalarynan úzindi oqydy.
Mátindi jatqa oqýǵa 5 mınýt ýaqyt berildi. Daıyn fonogrammany paıdalanýǵa tyıym salyndy.
Qazylar alqasy qatysýshylardy oqý sheberligi, daýys máneri, til tazalyǵy, kórkem mátindi tańdaý jáne sahnada ózin-ózi ustaýy talǵamyna saı baǵalady.
Baıqaý qorytyndysymen bas júldege almatylyq Arshyn Nurbaqyt laıyq dep tanyldy.
Jetisý oblysynyń ókili Arshyn Aıdynbekuly birinshi oryndy ıelendi.
Túrkistandyq Erjan Joldasov ekinshi, Batys Qazaqstan oblysynan qatysqan Bekzat Vasıhan úshinshi júldege ıe boldy.
Eske sala ketelik, budan buryn Atyraýda Muhtar Shahanovtyń jyr keshi ótkenin jazǵan edik.
