Jumbaqtasqa shyǵýǵa tyıym salynýy múmkin
ASTANA. KAZINFORM — Ekologııa jáne tabıǵı resýrstar mınıstri Erlan Nysanbaev Býrabaı tabıǵı parkiniń basshylyǵyna týrısterdiń Jumbaqtasqa shyǵýyna tyıym salýdy usynatynyn aıtty.
Úkimet otyrysynan keıin ótken baspasóz máslıhatynda jýrnalıst keıbireýler Jumbaqtasqa qurmetpen qaramaıtynyn aıtyp, tastyń ústine aıaq basýǵa tyıym salýdy usyndy.
«Negizi óte oryndy usynys. Ózim de kórip júrmin. Qazir tasqa deıin júzip baryp, ústine shyǵýǵa tyıym joq. Biraq ol tastarǵa jazý jazyp, tańba qaldyrýǵa tyıym salynǵan. Sonyń ózinde týrısterdiń kóbeıgenine baılanysty bul oryndy usynys dep oılaımyn. Bul tasqa shyǵýǵa tyıym salǵan durys shyǵar. Men Býrabaı ulttyq parkindegilermen sóılesemin. Bul park Prezıdent is basqarmasyna qaraıdy. Siz aıtqan usynysty aıtyp kóremin. Óte oryndy usynys», — dedi Erlan Nysanbaev.
