Jumanǵarın Úkimettiń ınflıatsııany tejeý sharalaryn atady
ASTANA. KAZINFORM — Tutynýshylardyń quqyqtaryn qorǵaý maqsatynda marketpleısterde bólip tólegen jáne bólip tólemegen kezde qosarlanǵan baǵalar praktıkasy engiziledi.
Bul týraly Úkimet otyrysynda makroekonomıkalyq turaqtandyrý jáne halyqtyń ál-aýqatyn arttyrý jónindegi birlesken is-qımyl baǵdarlamasyn tanystyrǵan Premer-mınıstrdiń orynbasary — Ulttyq ekonomıka mınıstri Serik Jumanǵarın aıtty.
— Inflıatsııany tejeý úshin Úkimet tarapynan mynadaı negizgi baǵyttar boıynsha sharalar kúsheıtiletin bolady: naryqty ónimmen molyqtyrý; saqtaý jáne tutynýshyǵa deıin jetkizý ınfraqurylymyn damytý; baǵa belgileýdi retteý jáne monopolııaǵa qarsy retteý. «Investıtsııalarǵa tapsyrys» baǵdarlamasyn iske asyrýǵa erekshe nazar aýdarylady. Ol ınflıatsııany tómendetý úshin óndiristerdi damytýda, eń aldymen, «qarapaıym zattar ekonomıkasy» taýarlaryn ilgeriletýde qoldanylatyn bolady, — dedi Serik Jumanǵarın.
Onyń aıtýynsha, jobalardy iske asyrý birqatar azyq-túlik taýarlary boıynsha ózin-ózi tolyq qamtýdy jáne eksportty qamtamasyz etedi.
Budan basqa, taýarlar qunyna kiretin syıaqylar, komıssııalar jáne ózge de tólemder týraly aqparatty ashyp kórsetýdi qosa alǵanda, marketpleısterde baǵa belgileýdiń ashyqtyǵyn arttyrý jóninde sharalar qabyldanady.
— Satýshylar men satyp alýshylar úshin ádil jaǵdaılar qalyptastyrý maqsatynda saýda alańdary men deldaldar komıssııalarynyń deńgeıin ońtaılandyrý tásilderi ázirlenedi. Tutynýshylardyń quqyqtaryn qorǵaý maqsatynda marketpleısterde bólip tólegen jáne bólip tólemegen kezde qosarlanǵan baǵalar praktıkasy engiziledi, — dedi ol.
Aıta keteıik, Mınıstrler kabınetiniń músheleri halyqtyń ál-aýqatyn arttyrý jónindegi birlesken is-qımyl baǵdarlamasyn talqyǵa salyp jatyr.
Osydan buryn memlekettik-jekeshelik áriptestik jobalaryn iske asyrýǵa mıkroqarjy uıymdary tartylatyny anyqtaldy.