Jumanǵarın: Sý basý qaýpi bar óńirlerdegi azyq-túlik qoryn qaýipsiz jerge jetkizý kerek
ASTANA. KAZINFORM – Úkimette vıtse-premer Serik Jumanǵarınniń tóraǵalyǵymen ótken keńeste áleýmettik mańyzy bar azyq-túlik taýarlary baǵasynyń qarqyny men óńirlerdegi azyq-túlik qorlarynyń saqtalý máseleleri talqylandy.
Qazirgi tańda statıstıka áleýmettik mańyzy bar azyq-túlik baǵasynyń eki apta qatarynan tómendegenin kórsettii. Sáýirde eki aptasyndaǵy baǵanyń jalpy ósý ındeksi: - 0,2%-dy qurady. Osylaısha, pııaz (-2,6%), kúnbaǵys maıy (-1,6%), qaraqumyq jarmasy men jumyrtqa (-1%), kúrish (-0,5%), rojkı (-0,2%) qunynyń tómendeýi tirkeldi. Sıyr etine ortasha baǵa ındeksiniń ósýi (0,6%) negizinen Aqtóbe oblysyndaǵy ónim qunynyń qysqa merzimdi qymbattaýyna baılanysty, onda tasymaldaýshylar etti barlyq ótkizý oryndaryna der kezinde jetkize almaǵan.
«Elimizdiń segiz óńirinde ÁMAT-tyń ortasha baǵa ındeksi tómendegeni baıqalyp otyr, onyń altaýynda nólge teń. Aqtóbe oblysynda (0,8%-ǵa), Mańǵystaý, BQO (0,2%-ǵa), Atyraý, Qaraǵandy jáne Abaı oblystarynda (0,1%-ǵa) baǵanyń birshama kóterilýi tirkelgen», — dep atap ótti saýda jáne ıntegratsııa birinshi vıtse-mınıstri Aıjan Bıjanova.
Sý tasqynynan zardap shekken óńirler
«Aldyn ala esepteýler boıynsha, óńirlerde 130 saýda nysany zardap shegip, Pavlodar oblysynyń bir kásipkerine keltirilgen shyǵyn óteldi. Qalǵandary boıynsha shyǵynnyń mólsherin anyqtaý jumystary júrgizilýde, Petropavlǵa Kókshetaý, Astana, Qaraǵandy jáne Omby qalalarynan aýyz sý jetkizý jumystary uıymdastyryldy. Táýlik boıy aýyz sý quıý týraly kelisimge «Kókshetaýmınsý» mekemesimen qol jetkizildi. Qazirgi tańda Petropavl qalasynyń barlyq dúkenderi men qoımalary sýmen qamtylǵan», — dedi Aıjan Bıjanova.
Vıtse-premer Jumanǵarınniń tapsyrmasy boıynsha Saýda komıteti BQO men SQO-daǵy kókónis qoımalaryn sý basý jáne ÁMAT qorlaryn joǵaltý qaýpi turǵysynan monıtorıng júrgizdi. BQO-da «El-Yrysy» bazarynyń aýmaǵynda turaqtandyrý qorynyń 293 tonna kúrish, 100 tonna qant, 46 tonna kúnbaǵys maıy saqtalǵany anyqtaldy. Qoıma sý basýdan qorǵalǵan.
SQO-da, ÁKK málimetinshe, kókónisterdiń negizgi qory satyldy, qalǵany sý basý qaýpi joq qoımalarda saqtalady.
«BQO-daǵy azyq-túlik qorlary bar qoımany sý basý qaýpi az bolsa da, qaýipsiz oryn taýyp, azyq-túlikti áketý kerek. Azdaǵan qaýip baıqalǵan barlyq óńirlerde azyq-túlik ónimderi qaýipsiz jerge jetkizilýi tıis», — dep málimdedi vıtse-premer.
Kókónisterdi bronnan shyǵarý
AShM málimetinshe, óńirlerde turaqtandyrý qorlarynan 77,5 myń tonna (42,8 myń tonna kartop, 11 myń tonna sábiz, 13,3 myń tonna pııaz, 10,3 myń tonna qyryqqabat) satyldy. Taǵy 84,8 myń tonna kókónis qaldy. Zardap shekken óńirlerde tamaq ónimderin jetkizýde irkilister baıqalmaıdy. Kókónis qoımalaryn, ÁKK qoımalaryn sý basý týraly aqparat áli túsken joq.
Jalpy, maýsymaralyq kezeńniń bastalýyn eskere otyryp, aýyl sharýashylyǵy vıtse-mınıstri Erbol Tasjúrekov ákimdikter men ÁKK-niń nazaryn kókónis qaldyqtaryn ótkizýdi kúsheıtýge jáne ımporttyq jáne erte egin jetkizýge sharttaryn jasaýǵa aýdardy.
Jambyl oblysynyń pııazy
Jambyl oblysy ákimdiginiń málimetinshe, búginde qoımalarda shamamen 37 myń tonna pııaz qalyp otyr. 2024 jyldyń birinshi toqsanynda eksportqa 162 myń tonna, sáýirde 11 elderge 22 myń tonna jóneltildi. Sý tasqynynan zardap shekken bes oblysqa 241 tonna pııaz gýmanıtarlyq kómek retinde jóneltildi.
Bul kókónisti jyldam satý úshin oblys jáne aýdan ortalyqtarynda ár senbi saıyn aýyl sharýashylyq jármeńkesi ótkiziledi, onda tómen baǵamen shamamen 10-15 tonna pııaz satylady.
