Jumanǵarın: Memleket Astana qarjy ortalyǵynyń kesirinen salyq joǵaltpaýy kerek
ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın Astana halyqaralyq qarjy ortalyǵynda qosylǵan qun salyǵy men korporatıvtik tabys salyǵynan jaltarý mehanızmi bar ekenin moıyndady.
— AHQO-ǵa kelsek, onyń basshylyǵymen birge talqylaıtyn máseleler bar. Óıtkeni AHQO el ishindegi qosymsha offshorǵa aınalýy múmkin. Biz budan salyq joǵaltamyz, — dedi ol senatorlardyń suraǵyna jaýap bere otyryp.
Aıtýynsha, kásiporyndardyń biri óziniń bas keńsesin holdıng arqyly AHQO-ǵa aýystyrǵan. Osynyń saldarynan bıýdjet 200 mlrd teńgeniń qosylǵan qun salyǵy men korporatıvtik tabys salyǵyn joǵaltqan.
— Bul alańdaıtyn tendentsııa. Sondyqtan mundaı sańylaýdy biteý kerek. Qazaqstanda jumys istep turǵan kompanııalar AHQO-ǵa kire alady. Biraq onyń saldarynan biz salyq joǵaltpaýymyz kerek. Biz engizetin ózgeristerdiń máni osynda, — dedi mınıstr.
Eske salsaq, búgin senat depýtattary Salyq kodeksiniń jańa redaktsııasyn talqylap jatyr.