Jumanǵarın qurylys kompanııalarynyń básekelestik emes artyqshylyq alý tásilderin atady
«Jer ýchaskelerin berýdiń básekeles tásili saýda-sattyq bolyp sanalady. Oǵan arnaıy ekonomıkalyq aımaqtardyń aýmaqtarynda nemese áleýmettik kásipkerlik korporatsııalardyń qatysýymen ınvestıtsııalyq jáne ınnovatsııalyq jobalardy iske asyrý jatpaıdy. Astana arnaıy ekonomıkalyq aımaq aýmaǵynda ónimder shyǵarýmen 50 ınvestıtsııalyq joba, turǵyn úı jáne ákimshilik keshender salý boıynsha 135 joba iske asyrylady. Onyń ishinde 65 turǵyn úı nysany «BI Group» holdıngine, 9-y «Bazıs-A», 7-ýi «Nur Astana Kurylys», 6-ýy «G-Park» tıesili», - dedi agenttik tóraǵasy.
Onyń atap ótýinshe, osy kompanııalar jer ýchaskelerin konkýrstan tys alýdan basqa múliktik, jer salyǵyn, kedendik bajdardy tóleýden bosatylǵan. Áleýmettik kásipkerlik korporatsııalar ınvestıtsııalyq jobalar túrinde jer ýchaskelerin turǵyn úıler, saýda ortalyqtaryn, fıtnes zaldar, janarmaı quıý stantsııasyn salý úshin satady.
«Básekelestik emes artyqshylyqtar alýdyń basqa tásili memlekettik satyp alý jáne memlekettik-jekeshelik áriptestik boldy. «Memlekettik satyp alý týraly» zańda Úkimet aıqyndaıtyn tulǵalardan bir kózden satyp alýdy júzege asyrý múmkindigi kózdelgen. Osy tásilmen Túrkistan qalasynda 566 mlrd teńge somasyna konkýrs ótkizbeı 149 nysandy salý qyzmetteriniń jetkizýshileri aıqyndalǵan. Onyń ishinde 140 mlrd teńge somasy nemese jumys kóleminiń 25 paıyzy eki qurylys salýshy «BI Group» jáne Bazıs-A-ǵa bólingen. Qalǵan jumys kólemi belgisiz ólshemsharttar boıynsha 250-den astam qurylys uıymdary arasynda bólindi», - dedi Serik Jumanǵarın.
Agenttiń tóraǵasynyń aıtýynsha, joldardy, aýrýhanalardy, mektepterdi jáne is júzinde qurylys qyzmetterin memlekettik satyp alý bolyp tabylatyn ózge de nysandardy salý jónindegi memlekettik-jekeshelik áriptestik rásimi ashyq emes jáne básekege qabiletsiz bolyp otyr.
«Bul jobalar jumsalǵan qarajatty tolyq jáne jedeldetilgen túrde qaıtarýdy 3-5 jyl aralyǵynda kózdeıdi», - dedi ol.
