Jumanǵarın Qazaqstan-Slovenııa ekonomıkalyq baılanysy jaıynda: iskerlik keńes qurý josparda

ASTANA. KAZINFORM – Premer-mınıstrdiń orynbasary — Ulttyq ekonomıka mınıstri Serik Jumanǵarın Qazaqstan men Slovenııanyń qarym-qatynasyna oraı pikir bildirdi.

- Jalpy aıtqanda qazirgi ýaqytta maqtanarlyq eshteńe joq. Sebebi bizdiń taýar aınalymymyz óte tómen – 106 mln dollar. Eksportymyzdyń ishinde fanera jáne tıtan bar. Al ımport – dári-dármek pen vaktsınalar. Biraq, qyzmetterdi damytý keleshegi bar. Olarda da, bizde de ІT salasy, jasandy ıntellekt salasy Eýropanyń basqa elderimen salystyrǵanda óte joǵary damyp keledi. Ekinshi – kólik-logıstıka. Sebebi, Slovanııa Eýropanyń kire berisinde ornalasqan. Úshinshi – týrızm. Mıneraldy óte tanymal kýrorttary bar. Qazaqstandyqtar óte jaqsy kóredi, jıi barady, - dedi Serik Jumanǵarın Aqordada BAQ ókilderiniń saýalyna oraı.

Vıtse-premerdiń atap ótýinshe, Qazaqstan men Slovenııa qarym-qatynasy jaman emes.

- Jaqynda úkimetarlyq kommısııa otyrysy josparlanǵan, mamyrda bolady. Sonda sheshimin tabatyn biraz másele bar. Biz óz tarapymyzdan Qazaqstannan Slovenııaǵa eksporttaýǵa bolatyn áleýetti taýarlar tizimin berdik. Olar da bizge berip jatyr. Eki el arasynda iskerlik keńesin qurý josparlanǵan, - dedi ol.

Aıta keteıik, qazirgi ýaqytta elimizge resmı saparmen kelgen Slovenııa Prezıdenti Natasha Pırts-Mýsar Aqordada Memleket basshysy Qasym-Jomart Toqaevpen kelissóz ótkizip jatyr.