Jumanǵarın ımport dáriler jaıynda: Baǵasyn ustap tura almaımyz

ASTANA. KAZINFORM – Úkimet ımporttalatyn dári-dármektiń áleýmettik tizimin jasap, salyqtan bosatpaq. Bul týraly Májilistiń jalpy otyrysynda Premer-Mınıstrdiń orynbasary – Ulttyq ekonomıka mınıstri Serik Jumanǵarın aıtty.

Otyrys barysynda Májilis depýtaty Ashat Aımaǵambetov áleýmettik, onyń ishinde onkologııa, orfandyq aýrýlar boıynsha salyqty alyp tastaý óte, jaqsy ymyra bolǵanyn aıtty.

- Bul júz myńdaǵan adamnyń taǵdyryna qatysty mańyzdy sheshim edi. Degenmen basqa da baǵyttaǵy dári-dármek pen medıtsınalyq qyzmetterge 10 paıyz QQS pen 10 paıyz korporatıvtik salyq bolsa, onda birden 20 paıyz júkteme bolaıyn dep tur. Basqa sektorlardy qarasaq, 12-den 16 paıyzǵa kóterýdiń ózi suraq týǵyzyp otyr. Al bul jerde birden 20 paıyz bolaıyn dep tur. Sondyqtan bul ózgeris medıtsınalyq qyzmetterdiń qymbattaýyna ákelýi ábden múmkin. Áleýmettik aýrýlarǵa 0 paıyzǵa kelisip otyrsaq, basqa aýrýlar boıynsha dárilerge 10-nan 5 paıyzǵa túsirý jáne medıtsınalyq qyzmetterge de 10-nan 5 paıyzǵa deıin túsirip, biraq kezeń-kezeńimen múmkin ony arttyrý máselesine qalaı qaraısyzdar? - dep surady.

Osy oraıda vıtse-premer tek aqyly medıtsınalyq qyzmetterge ǵana qosylǵan qun salyǵy salynatynyn alǵa tartty.

- Sebebi úkimettik jáne jeke emhanalar bar. Olardyń básekege qabilettiligi birdeı bolýy kerek. Eshqandaı aıyrmashylyq bolmaıdy. Sebebi biz biraz syn estidik. Al siz aıtqan MÁMS ishinde bar. Olarǵa bizdiń reformanyń eshqandaı áseri bolmaıdy. Sebebi eshqandaı salyq salynbaıdy. Dári-dármekterge qatysty jaǵdaıdy bilesizder. 85 paıyzy sheteldik, ımporttalady. Men qazir naqty aıta almaımyn, baǵa 1 000 paıyzǵa deıin ósti. Baǵany ustaı almaımyz. Baǵa qurylymyn qaraǵanda onyń ishinde 50 paıyz marketıng, 30 paıyz jarnama bar. Qosyla beredi. Olardy toqtata almaımyz. Biz qazir jeńildikti ımportqa, sodan keıin deldaldarǵa beremiz. Osyǵan oraı atalǵan dári-dármekterdiń áleýmettik tizimin jasaımyz. Olarǵa salyq salmaımyz. Qalǵandaryna 10 paıyz salyq bolady, - dedi Serik Jumanǵarın.

Aıta keteıik, búgin Premer-mınıstrdiń orynbasary Májilistiń jalpy otyrysynda Salyq kodeksiniń jobasyndaǵy sońǵy ózgeristerdi atady.