Jumanǵarın bastaǵan qazaqstandyq delegatsııa Novosibir oblysyndaǵy ǵylymı qalashyqqa bardy
ASTANA. KAZINFORM – Vıtse-premer – ulttyq ekonomıka mınıstri Serik Jumanǵarın bastaǵan qazaqstandyq delegatsııa Novosibir oblysynda qurylǵan Reseı Ǵylym akademııasy Sibir bólimshesiniń (RǴA SB) bazasyndaǵy Reseıdegi eń iri ǵylymı-bilim berý jáne ınnovatsııalyq ortalyqta boldy.
Delegatsııa quramyna Ónerkásip jáne qurylys, Tsıfrlyq damý, ınnovatsııalar jáne aeroǵarysh ónerkásibi, Ǵylym jáne joǵary bilim mınıstrlikteriniń, UEM janyndaǵy Ekonomıkalyq zertteýler ınstıtýtynyń basshylary, bıznes ókilderi kirdi.
RǴA Sibir bólimshesi – Akademııanyń eń iri óńirlik bólimshesi. Onyń aıryqsha ereksheligi, ǵylymı-zertteý qyzmetin qoldanbaly jáne memlekettik mindetterdi sheshýge arnaǵan. RǴA SB tóraǵasy Valentın Parmon atap ótkendeı, ekojúıe dáıekti ıntegratsııa prıntsıpi boıynsha jumys isteıdi: ǵylym bilimdi qalyptastyrady, sodan keıin olardy bilim berý júıesine engizý men praktıkalyq iske asyrý júredi.
Novosibir ǵylymı ortalyǵynyń aýmaǵynda úsh akademııalyq qalashyq, RǴA SB 53 ǵylymı-zertteý ınstıtýty, Novosibir memlekettik ýnıversıteti, Akademııalyq park, medbıotehnopark, «Koltsovo» ǵylymı qalashyǵy jáne ǵylymı-ınnovatsııalyq klasterdiń basqa da negizgi obektileri jumys isteıdi. 2003 jyly ǵylymı qalashyq retinde resmı mártebege ıe bolǵan Koltsovo búginde Reseıdegi eń iri bıotehnologııalyq klasterdiń biri. Munda Ebola, A gepatıti jáne COVID-19 vaktsınalaryn jasaǵan «Vektor» vırýsologııa jáne bıotehnologııa Memlekettik ǵylymı ortalyǵy ornalasqan. Klasterde 30-dan astam shaǵyn ınnovatsııalyq kompanııa jumys isteıdi.
Novosibir oblysynyń gýbernatory Andreı Travnıkov, RǴA SB tóraǵasy Valentın Parmon, ǵylymı orta men bıznes ókilderi qatysqan jumys jınalysynda Lavrentevtiń «ǵylym – bilim – óndiris» úshtaǵany qaǵıdaty boıynsha qurylǵan ekojúıeniń tehnologııalyq jáne ınnovatsııalyq artyqshylyqtary aıtyldy.
Andreı Travnıkov atap ótkendeı, akademııalyq qalashyq, ǵylymı qalashyq, atom qalashyǵy sııaqty ártúrli formattaǵy ǵylym men tehnologııa kóp shoǵyrlanǵan aýmaq qurý tájirıbesi ótken ǵasyrda ózin san márte aqtaǵan. Ol HHІ ǵasyrda qoldanýǵa da, qaıtalaýǵa da laıyq. Eger tájirıbe paıdaly bolyp, Qazaqstannyń ǵylymı-tehnologııalyq áleýetin damytýǵa yqpal etip jatsa, ol qýanarlyq jaǵdaı.
Kezdesýde ekonomıkalyq kórsetkishter de aıtyldy: Akademııalyq park rezıdentteriniń 2021 jyldan 2024 jylǵa deıingi jıyntyq kirisi eki ese: sáıkesinshe 31,8 mlrd rýblden 60,5 mlrd rýblge deıin ósken. Tólengen salyq mólsheri 2021 jyly 2,9 mlrd rýblden 2024 jyly 6,7 mlrd rýblge deıin artqan.
– Biz ShOB-ty damytýdy kózdeımiz, tehnologııalyq ortalyqtardy keńeıtýge kóp kóńil bólemiz. Bizdiń baǵalaýymyz boıynsha, Akademparktiń 253 rezıdenti Novosibir oblysynyń jalpy óńirlik óniminiń shamamen 1,5%-yn qamtamasyz etedi. Salystyrar bolsaq, óńirdiń barlyq agrarlyq sektorynyń úlesi JÓÓ-niń shamamen 5%-y, - dep atap ótti «Novosibir Akademııalyq qalashyǵy tehnoparki» AQ bas dırektory Dmıtrıı Verhovod.
Qazaqstandyq delegatsııa Reseıdegi alǵashqy 4+býyndy sınhrotrondyq sáýlelený kózi – «Sibir aınalmaly foton kózi» (SAFK) ujymdyq paıdalaný ortalyǵynyń qurylys alańyna bardy. 2025 jyldyń sońynda iske qosylatyn ortalyq – eýropalyq jáne ońtústik amerıkalyq tehnologııamen salystyrýǵa bolatyn álemdegi eń ozyq ǵylymı qondyrǵynyń biri.
Sapar sońynda Serik Jumanǵarın RǴA Sibir bólimshesine jáne Novosibir oblysy ákimshiligine ǵylymı-ınnovatsııalyq klaster qurý tájirıbesimen tanysýǵa múmkindik jasaǵany úshin alǵys aıtty. Taraptar ǵylym qalashyǵynyń jumys isteý modelin tereńirek zerdelep, ony Qazaqstanda qoldanýdyń bolashaǵyn baǵalaý úshin beıindi mamandarmen tájirıbe almasýdy jolǵa qoıýǵa ýádelesti
Eske sala keteıik, buǵan deıin Senat depýtattarynyń saýalyna jaýap bergen Premer-Mınıstr Oljas Bektenov memlekettik organdar óz bastamasymen obektıvti resmı aqparatty halyqqa jetkizýge mindetti ekenin aıtqan bolatyn.