Jumanǵarın AHQO arqyly 200 mlrd teńge salyqtan jaltarmaq bolǵan kompanııa týraly pikir bildirdi

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın Májilistiń jalpy otyrysynan keıin Astana halyqaralyq qarjy ortalyǵy arqyly salyq jaltarmaq bolǵan kompanııa týraly pikir bildirdi.

Jýrnalıster vıtse-premerden eki kún buryn Senat otyrysynan keıin atalǵan kompanııanyń atyn ataýdan nege bas tartqanyn surady. 

— Men Astana halyqaralyq qarjy ortalyǵyn Ortalyq Azııadaǵy eń úzdik qarjy ortalyǵy dep esepteımin. Másele siz surap turǵan kompanııada emes. Óıtkeni ol eshbir zańdy buzǵan joq. Kompanııanyń atyn atamaımyn degenim sodan. Sebebi repýtatsııasyna kesiri tııýi múmkin. Buǵan zańnama jol bergen. Keshe osyndaı zań sańylaýlaryn biteý kerek dep aıtqan edik. Bıznestiń salyqtan jaltarý úshin bólshektenip ketkenin qanshalyqty uzaq talqylaǵanymyz esterińizde shyǵar. Aqyry eń tómengi shekti ózgerttik degendeı. Bul da sol sııaqty qajyr-qaıratty qajet etetin, óte názik másele. Óıtkeni zańnamany ózgertý arqyly Astana halyqaralyq qarjy ortalyǵynyń jumys tártibin ózgertip jatyrmyz degen sıgnal berýge bolmaıdy, — dedi ol.

Ulttyq ekonomıka mınıstri AHQO-ǵa tirkelgen kompanııalar tóleıtin dıvıdentter salyqtan bosatylǵanyn eske saldy.

— Sondyqtan bul jeńildikti kompanııalar paıdalanyp qalýǵa talpynady. Biraq ortalyq bárinen buryn Qazaqstanda burynnan jumys istep jatqan jergilikti kompanııalardy ózine baýraý úshin emes, shetelden ınvestıtsııa tartý úshin qurylǵan, — dedi vıtse-premer.

Serik Jumanǵarın Astana qarjy ortalyǵy salyqtan jaltaratyn qazaqstandyq kompanııalar qalaı áshkere bolyp jatqanyn aıtty.

— Biz ony qalaı anyqtaımyz? Jyldar boıy salyq tólep kele jatady da, tólemeı qalady. Nege tólemeısiz desek, basqa alańǵa tirkelip alǵanyn aıtady. Keshe áńgime bolyp ketken kompanııa arnaıy ekonomıkalyq aımaqta tirkelgen. Sol arqyly talaı jeńildik alǵan. Endi Astana qarjy ortalyǵy arqyly qosymsha jeńildikter almaqshy. Olaı bolmaıdy. Tańdaý jasaýyń kerek — ne arnaıy ekonomıkalyq aımaqta bol, ne Astana qarjy ortalyǵynda bol. Biz budan salyq joǵaltamyz. Ol kompanııaǵa sanktsııa qoldanaıyq dep jatqan joqpyz. Óıtkeni zańnamada osyǵan jol berilgen. Biz zańdaǵy sol sańylaýdy biteý týraly aıtyp júrmiz, — dep túsindirdi ol.

Eske salsaq, Serik Jumanǵarın Senat otyrysynda Astana halyqaralyq qarjy ortalyǵynda qosylǵan qun salyǵy men korporatıvtik tabys salyǵynan jaltarý mehanızmi bar ekenin moıyndaǵan bolatyn.