Jumanǵarın: 70% bıznes jeńildetilgen rejımdi qoldana beredi
ASTANA. KAZINFORM – Jańa Salyq kodeksi bızneske ákimshilik júktemeni aıtarlyqtaı azaıtady. Bul týraly Premer-Mınıstrdiń orynbasary – Ulttyq ekonomıka mınıstri Serik Jumanǵarın Astanada ótken jańa Salyq kodeksin túsindirý jónindegi semınarda málimdedi.
Vıtse-premerdiń aıtýynsha, arnaıy salyq rejımin qoldanýǵa ruqsat beriletin jáne berilmeıtin kásipkerlik qyzmet túrleriniń aldyn ala tizbeleri aptanyń sońyna deıin «Ashyq NQA» portalynda jarııalanady. Aldyn ala esep boıynsha jeńildetilgen deklaratsııa negizindegi arnaıy salyq rejımi eldegi barlyq salyq tóleýshilerdiń shamamen 70%-yna qoldanylady.
«Ońaılatylǵan rejımmen tek jeke tulǵalarǵa bólshek saýda qyzmetin kórsetetin kásipkerler ǵana jumys isteı alady. Al zańdy tulǵalarmen jumys isteıtin kompanııalar tolyqqandy býhgalterlik esep júrgizip, jalpy salyq salý rejımin qoldanýy tıis», — dedi Serik Jumanǵarın.
Onyń aıtýynsha, «tyıym salynǵan tizimge» bızneske arnalǵan taýar óndirip, qyzmet kórsetetin salalar kiredi. Máselen, óńdeý ónerkásibi, qurylys pen jer qoınaýyn paıdalaný, tabıǵı monopolııalar, 2 myń sharshy metrden asatyn kóterme jáne iri bólshek saýda nysandary.
Sonymen birge shekteý telekommýnıkatsııa, ınternet pen IT, qarjylyq jáne saqtandyrý qyzmeti, konsaltıng, kásibı jáne agenttik qyzmet, sondaı-aq ǵylymı zertteýler men ázirlemeler sektoryna qoldanylady.
Saladaǵy operatsııalardyń úlesi keıbir baǵyttarda is júzinde 100%-ǵa jýyq. Máselen, qurylysta — 99,9%, jer qoınaýyn paıdalanýda — 98,7%, kólik pen qoımada — 96,7%. Bul derekter jeńildetilgen rejımdi búginde negizinen shaǵyn bıznes emes, iri kompanııalar paıdalanyp otyrǵanyn kórsetedi.
«Jalpy ekonomıkalyq qyzmettiń 700-den astam túrine qatysty áńgime bolyp otyr. Bul — barlyq EQJJ-niń shamamen 70%-y. Biraq salyq tóleýshiler turǵysynan alsaq, jeńildetilgen rejımge tyıym salý kásiporyndardyń shamamen 30%-yna ǵana áser etedi», — dedi mınıstr.
Sonymen qatar, jeńildetilgen salyq rejımi saqtalatyn ekinshi topta bıznestiń 300-den astam túri bar. Olardyń qatarynda 2 myń sharshy metrge deıingi saýda alańdaryndaǵy bólshek saýda, dárihanalar, qoǵamdyq tamaqtaný nysandary, qonaq úıler, turǵyn úı men kólikti jalǵa alý, jeńil jáne tamaq ónerkásibi kásiporyndary, jolaýshylar tasymaly, balabaqshalar men úıirmeler, medıtsınalyq jáne áleýmettik qyzmetter bar. Sondaı-aq halyqqa qajet turmystyq jáne qurylys qyzmeti, kreatıvti ındýstrııanyń jekelegen túrleri, mádenı jáne sport nysandary, aýyl sharýashylyǵy osy tizimge engizilgen.
«Osylaısha aldyn ala baǵalaýlar boıynsha jeńildetilgen rejım barlyq salyq tóleýshilerdiń shamamen 70%-yna saqtalady. Bul degenimiz, turǵyndarǵa qyzmet kórsetetin shaǵyn bıznes jeńildikti rejımdi ári qaraı qoldana alady. Al iri bıznes jalpy belgilengen rejımge aýysady», — dep naqtylady Serik Jumanǵarın.
Onyń sózine qaraǵanda, tizimderdiń jobasy áli ázirlený ústinde. Aldyn ala nusqasy «Ashyq NQA» portalynda jarııalanyp, keıin bıznes qaýymdastyq jáne sarapshylarmen talqylanady.
Aıta keteıik, jańa Salyq kodeksine saı, kólik, qoıma jáne poshta qyzmetinde gradatsııa qaǵıdaty qoldanylatyny habarlandy.