Jumaǵalıev BǴM men Qorǵanys mınıstrliginen memqyzmetterdi avtomattandyrýdy tezdetýdi surady

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev bıylǵy jyldyń sońyna deıin elektrondyq qyzmetterdiń úlesi 80 paıyzǵa deıin (723 qyzmettiń 580-i) jetkiziletinin málim etti, dep habarlaıdy QazAqparat tilshisi.

«Al 2020 jyly memlekettik qyzmetterdiń 90 paıyzyn avtomattandyrýmen jumystar aıaqtalady. Qazirdiń ózinde qyzmetterdiń 70,5 paıyzy avtomattandyrylǵan. Jyldyń sońyna deıin memlekettik organdar taǵy 70 memlekettik qyzmet boıynsha jumysty aıaqtaýy qajet. Bul jerde jumystyń aýqymdy úlesi Bilim jáne ǵylym, Qorǵanys mınıstrlikterine tıesili (sáıkesinshe 26 jáne 8 qyzmet) ekenin atap ótemin. Bul mınıstrlikterden jáne basqa da áriptesterden osy jumysty tezdetýdi suraımyn», - dedi mınıstr Úkimet otyrysynda.

Asqar Jumaǵalıevtiń aıtýynsha, memlekettik qyzmetterge qol jetkizýdiń eń ońaı joly - mobıldik tehnologııalar. Mınıstrdiń dereginshe, qazaqstandyqtardyń 64 paıyzy smartfondy paıdalanady.

«Elektrondy qyzmetterdi alýdyń taǵy bir jeńil joly – bul Telegram messendjeri jáne áleýmettik jeliler. Eń tanymal degen qyzmetter osy mobıldi qosymshalar arqyly kórsetiledi. Memlekettik qyzmetterdi elektrondyq formatqa aýystyrý nátıjesinde halyqtan artyq anyqtama talap etilmeıdi. Oǵan dálel – osy jyldyń 1 qarashasynan bastap mekenjaı anyqtamasy joıyldy. Jyl saıyn 14 mıllıonan astam osyndaı anyqtama berilip keldi. Olardy joıý 3,3 mlrd teńge shamasynda janama ekonomıkalyq áser beredi. Qazir taǵy da 27 anyqtamany joıý boıynsha jumys júrgizilýde», - dedi ol.