Jumabek Kenjalınmen qoshtasý Jazýshylar odaǵynda ótedi
ALMATY. QazAqparat - «Qazaq gazetteri» JShS-niń bas dırektory, redaktorlar keńesiniń tóraǵasy Jumabek Kenjalınmen qoshtasý rásimi erteń, 25 shilde kúni QR Jazýshylar odaǵy ǵımaratynda ótedi, dep habarlaıdy QazAqparat tilshisi «Qazaq gazetteri» JShS-ne silteme jasaı otyryp.
Qazaqstan Respýblıkasynyń mádenıet qaıratkeri Jumabek Kenjalınmen qoshtasý rásimi erteń, 25 shilde kúni QR Jazýshylar odaǵy ǵımaratynda saǵat 10-00-de, janazasy marqumnyń óz úıinde saǵat 09-00-de ótedi.
Búgin 24 shilde kúni, 63 jasqa qaraǵan shaǵynda «Qazaq gazetteri» JShS-niń bas dırektory Jumabek Kenjalın dúnıeden ozdy.
Kenjalın Jumabek Omaruly 1954 jyly 30 jeltoqsanda Qostanaı oblysynyń Amangeldi aýdanyndaǵy «Jańa turmys» kolhozynda týǵan. 1971 jyly Arqalyq aýdanyndaǵy Qaıyndy orta mektebin bitirgen soń, sharýashylyqta jumysshy, elektrmen dánekerleýshi, keıin orta mekteptiń muǵalimi bolyp qyzmet atqardy.
1981 jyly S.M.Kırov atyndaǵy Qazaq Memlekettik ýnıversıtetin bitirdi. Ol birqatar Dúnıejúzilik jáne Búkilodaqtyq jastar men stýdentterdiń forýmdaryna qatysty. 1978 jyly halyq depýtattary Almaty qalalyq sovetiniń depýtattyǵyna saılandy.
1981 jyly «Egemen Qazaqstan» («Sotsıalıstik Qazaqstan») gazetinde áýeli tilshi, keıin bólim meńgerýshisi, 1986-1988 jyldary «Zerde» («Bilim jáne eńbek») jýrnalynda jaýapty hatshy, bas redaktordyń mindetin atqarýshy, 1994 jyldan «Halyq keńesi» gazetiniń bas redaktory boldy. 1996 jyldan «Aqıqat» jýrnalynyń bas redaktory, 1997-1999 jyldar aralyǵynda «Qazaq ádebıeti» gazetiniń bas redaktory qyzmetin atqardy.
1999 jyldan 2007 jylǵa deıin «Qazaq gazetteri» JAQ-nyń prezıdenti, bas dırektory, «Ana tili» ulttyq aptalyǵynyń, «Aqıqat» ulttyq qoǵamdyq-saıası jýrnalynyń bas redaktory qyzmetterinde boldy. Búgingi kúnge deıin «Qazaq gazetteri» JShS-nyń Bas dırektory - redaktorlar keńesiniń tóraǵasy qyzmetin atqardy.
Ol 2004 jyly «Buqaralyq aqparat quraldarynyń qazaqstandyq patrıotızmdi qalyptastyrýdaǵy róli» degen taqyrypta saıası ǵylymdarynyń kandıdaty ataǵyn alý úshin dıssertatsııa qorǵaǵan.
J.Kenjalın Qazaqstan Úkimeti janyndaǵy Memlekettik termınologııalyq komıssııa múshesi, HVІІ shaqyrylǵan halyq depýtattary Almaty qalalyq keńesiniń depýtaty bolyp saılanǵan.
Ol «Jelkildep ósken quraqtaı» (1988j.), «Shyndyqty shyraq etip ustańyz» (1998j.), «Ult rýhyn ulyqtaǵan urpaqpyz» (2005j.), «Saıası menedjment jáne baspasózdiń jurtshylyqpen baılanys máseleleri» (2010j.), «Er Jáýke minbegenmen altyn taqqa» (2011j.) dep atalatyn kitaptardyń avtory.
J.Kenjalın - Qazaqstan Respýblıkasy Prezıdentiniń buqaralyq aqparat quraldary salasyndaǵy syılyǵynyń laýreaty (2006 j.), Qazaqstan Jýrnalıster odaǵy syılyǵynyń laýreaty (1983 j), Qazaqstan Jýrnalıster Akademııasynyń tolyq múshesi-akademıgi (2001 j), Qazaqstan Respýblıkasynyń mádenıet qaıratkeri (2004 j.), «Qurmet» ordeniniń (2009j.), Qazaqstan Respýblıkasynyń Táýelsizdigine - 20 jyl» medaliniń (2011j.) ıegeri, Qazaqstan Jazýshylar odaǵynyń múshesi bolǵan.
