Juma kúni respýblıkanyń soltústigi men shyǵysynda burshaq jaýýy yqtımal - Qazgıdromet
ASTANA. QazAqparat - 10 shilde kúni respýblıkanyń soltústigi, ortalyǵy, shyǵys jáne ońtústik-shyǵysynda turaqsyz aýa raıy saqtalady, keı jerlerde naızaǵaıly jańbyr jaýyp, jel kúsheıedi, respýblıkanyń soltústiginiń jáne shyǵysynyń keı jerlerinde burshaq jaýýy yqtımal, respýblıkanyń qalǵan aımaqtarynda aýa raıy jaýyn-shashynsyz bolady.
Bul týraly «Qazgıdromet» RMK habarlady. Túnde Aqmola oblysynyń keı jerlerinde jel 15-20 m/s kúsheıedi, kúndiz oblystyń basym bóliginde jeldiń kúshi 15-20, keı jerlerde 23 m/s bolady, keı jerlerde burshaq jaýýy yqtımal. Almaty oblysynyń keı jerlerinde shańdy daýyl turyp, jel 15-20 m/s kúsheıedi, kúndiz jeldiń ekpini 25 m/s bolady. Qaraǵandy, kúndiz Jambyl, Batys Qazaqstan, Qostanaı oblystarynyń keı jerlerinde jel 15-20 m/s kúsheıedi. Soltústik Qazaqstan, Shyǵys Qazaqstan, kúndiz Pavlodar oblystarynda jel 15-22 m/s kúsheıip, burshaq jaýýy yqtımal. Atyraý oblysynda, kúndiz Mańǵystaý, Batys Qazaqstan oblystarynyń keı jerlerinde qatty ystyq kútiledi. Aqtóbe, Qyzylorda, Ońtústik Qazaqstan oblystarynyń basym bóliginde, Jambyl, Atyraý, Batys Qazaqstan, Qaraǵandy, Almaty oblystarynyń keı jerlerinde óte joǵary órt qaýipi saqtalady.
